Prestafélag Íslands

Stjórnarfundur P.Í. 4. september 2007

Fundur stjórnar PÍ haldinn að Lækjarbakka í Miðfirði þriðjudaginn 4.september 2007.

Fundinn sátu: sr.Ólafur Jóhannsson formaður, sr.Sigrún Óskarsdóttir varaformaður, sr.Magnús Magnússon kjaramálafulltrúi, sr.Ingileif Malmberg ritari, sr.Elínborg Sturludóttir og sr.Magnús B. Björnsson gjaldkeri. Sr. Þorvaldur Víðisson boðaði forföll.

1. Fundur settur með ritningarorði og bæn.

2. Endurmenntun/símenntun presta og guðfræðinga:

Fyrirhugað er að halda námskeið um sáttameðferð í Skálholti dagana 18.-19.nóvember næst komandi. Námskeiðið er á vegum PÍ og Skálholtsskóla. Jafnframt var samþykkt að leilta til sr.Guðbjargar Jóhannesdóttur varðandi fræðslu á námskeiðinu en hún hefur nýlega lokið framhaldsnámi á sviði sáttameðferðar.

Þá stendur guðfræðideild HÍ til boða að fá hingað til lands Gordon Lathorp guðfræðing til að halda námskeið um “prestinn og guðfræði lítúrgíunnar”. Hefur dr.Pétur Pétursson beðið um viðbrögð stjórnar þar að lútandi. Stjórnin fagnar framlagi guðfræðideildarinnar og verður námskeiðið haldið í janúar eða maí 2008.

3. Kjaramál.

a. Almennar áherslur PÍ til kjararáðs:

Helstu áherslur fyrir kjararáð eru eftirfarandi: Allir prestar hafi sömu grunnlaun. Lögð verði áhersla á hækkun grunnlauna og að fleiri einingar fari inn í grunnlaun þar sem það leiði til hærri lífeyris presta.

b. Prófastar: Áhersla verði lögð á hækkun grunnlauna prófasta vegna aukinna verkefna og stjórnunarstarfa þeirra.

c. Tengsl aukaverka og eininga: Hér er lögð á það áhersla að greiðsla fyrir aukaverk taki mið af einingum. Reynt verði að fá kjararáð til að úrskurða um laun presta vegna allra skírna. Þau laun yrðu í formi eininga í hlutfalli við ætlaðan fjölda skírna miðað við stærð prestakallsins.

d. Bakvaktamál: Umræða fór fram um vaktkerfi presta. Mikilvægt er að koma sem fyrst á bakvaktakerfi sem samsvarar viðbragðskerfi áfallaáætlunar þjóðkirkjunnar. Þá fyrst verður hægt að sækja fast til kjararáðs um fjármögnun bakvakta. Lagt til að nýju vaktkerfi verði komið á eigi síðar en 1.janúar 2008.

4. Kirkjuþing 2007, málefni sem snerta PÍ sérstaklega:

Almenn umræða um þau mál er snerta presta landsins. Þau mál er sérstaklega voru til umræðu snertu breytta stöðu prestssetra, val á prestum, rekstrarkostnað prestsembætta, breytingar á aukaverkagreiðslum og breytingar á lögum eða starfsreglum í tengslum við framkvæmd fimm ára ráðningar í embætti. Mál þessi verða rædd á næsta stjórnarfundi PÍ. Mun stjórnin kynna sér þau betur fyrir þann fund.

5. Ósk sr.Carlosar A. Ferrer um lokafjárstyrk kr.180 þúsund krónur vegna lögfræðikostnaðar í tengslum við starfslok sr.Carlosar í Tjarnaprestakalli:

Álit Umboðsmanns Alþingis kynnt á fundinum, en sama álit endar með þessum orðum: “.........með tilliti til þess sem að framan er rakið tel ég ekki efni til athugasemda af minni hálfu við þá ákvörðun dóms- og kirkjumálaráðherra að auglýsa embætti Carlosar Ara laust til umsóknar, enda þótt aðeins Kálfatjarnarsókn, sem önnur og fámennari sókn prestakallsins, hafi samþykkt um að leggja til við ráðherra að embætti Carlosar yrði auglýst að nýju. Er umfjöllun minni um kvörtun Carlosar Ara því lokið, sbr. 1.mgr. 10.gr.laga nr.85/1997, um umboðsmann Alþingis. Virðingarfyllst, Tryggvi Gunnarsson.”

Stjórn PÍ samþykkir að veita sr.Carlosi 180 þúsund kr. lokafjárstyrk vegna lögfræðikostnaðar hans.

6. Önnur mál:

a. Stjórnin staðfesti fyrri ákvörðun um að leggja fram 200.000 til sérrits Kirkjuritsins til heiðurs dr.Sigurbirni Einarssyni biskupi.

b.Samþykkt að sr. Elínborg Sturludóttir taki við umsjón tölvupóstlista PÍ.

c. Samþykkt að hafa samveru fyrir þjónandi og fyrrum þjónandi presta fimmtudagskvöldið 8.nóvember næstkomandi. Staðsetning og dagskrá verður auglýst síðar.

d. Samþykkt að hafa stjórnarfundi PÍ að jafnaði fyrsta fimmtudag hvers mánaðar. Næsti reglulegi stjórnarfundur bókaður þann 8.nóvember næstkomandi. Fundur með biskupi og kirkjuráði um kirkjuþingsmál verður boðaður sérstaklega.

Fleira ekki gert, fundi slitið.

Stjórnarfundur P.Í. 7. júní 2007

Fundur PÍ haldinn í Grensáskirkju fimmtudaginn 7.júní kl. 13:00.

Fundinn sátu sr. Ólafur Jóhannsson, sr. Sigrún Óskarsdóttir, sr. Magnús B. Björnsson, sr. Magnús Magnússon, sr. Ingileif Malmberg og sr. Elínborg Sturludóttir.

1. Fundarsetning:

Formaður Ólafur Jóhannsson setti fund með ritningarorði og bæn.

2. NPS-fundur og fulltrúaráðsfundur danska prestafélagsins:

Formaður og varaformaður PÍ sátu NPS-fund í Osló sem haldinn var dagana 14.-16.maí 2007. Á fundinum var umræðan um samband ríkis og kirkju ofarlega á baugi og mótaðist umræðan mikið af stöðunni eins og hún er í Noregi í dag. Í Noregi greiðir ríkið laun presta og hefur einnig mikið að segja um embættisveitingar. Sveitarfélögin reka kirkjuna að stórum hluta og standa straum að kostnaði t.d. safnaðarheimila, kirkjuhúsa, organista, djákna og annars starfsfólks og starfssemi. Mikill munur getur verið á því hversu mikið sveitarfélögin leggja í kirkjulegt starf á hverjum stað, fer það eftir stjórnskipan og áhuga á hverjum stað fyrir sig. Á NPS-fundinum var talsvert um það rætt hvernig samræma mætti þetta betur. Meiri hluti þeirra sem starfa í norsku kirkjunni vill tengsl milli ríkis og kirkju í gegnum lög en ekki stjórnarskrá eins og nú er. Flestum finnst einnig ríkið hafa of mikið að segja hvað varðar embættisveitingar.

Að loknum NPS-fundinum í Osló hélt formaður PÍ sr.Ólafur Jóhannsson til Danmerkur og sat þar fulltrúaráðsfund danska prestafélagsins. Á danska fulltrúaráðsfundinum tíðkast það að kirkjumálaráðherra er með framsögu og svarar síðan spurningum danskra presta og þeirra sem fundinn sitja. Í dönsku kirkjunni hefur aðalkostnaðaraukinn undanfarin ár verið launakostnaður annars starfsfólks en presta. Ríkið borgar afur á móti laun presta en í Danmörku standa nú yfir breytingar á launakerfi danskra presta sem felur í sér ma. að yngri prestar verða fljótari að hækka í launum sínum. Danskir klerkar eru uppteknir af spurningunni hver sé þeirra vinnuveitandi. Biskupar teljast ekki vinnuveitendur presta, heldur einhvers konar tilsjónarmenn. Prestastéttin er einhvers staðar á milli ráðuneyta kirkjumála og fjármála.

3. Kjara- og starfskjaramál:

Kjaramálafulltrúi sr. Magnús Magnússon lagði

fram punkta fyrir kjararáð er varða sóknarfæri í kjaramálum presta.

Helstu áhersluatriði eru eftirfarandi:

- Allir prestar fái sömu grunnlaun.

- Áhersla á hækkun grunnlauna.

- Fleiri einingar inn í grunnlaun.

Rökstuðningar fyrir þessu er að lífeyrisgreiðslur presta hækki. Eðlilegt sé að meginhluti launa sé inn í grunnlaunum, eins og einingar, en allt að 15 eingar fari inn í grunnlaun þ.e. eftir fjölda sóknarbarna.

Þá má hugsa sér að skírnargreiðslur fari inn í laun, t.d. í gegnum einingar.

- Bakvaktir verði samræmdar og viðbragðsáætlun þannig að hver prestur í prófastsdæmi sé á vakt fyrir hvort tveggja ákveðið tímabil í senn t.d. eina viku. Þá er hægt að fara að sækja fast á með greiðslur fyrir bakvaktir.

- Þrýsta á prestssetrasjóð að lækka leigu á prestssetrum annað hvort með því að frysta leigu milli ára eða lækka prósentuhlutfallið af fasteignamati, sem útreikningur leigunnar er byggður á.

- Hækkaður embættis- og aksturskostnaður, en það mál er í farvegi.

Ákveðið að fulltrúar úr stjórn PÍ efni til viðræðna um bakvaktarmálin og taki upp þráðinn að nýju.

4. Trúnaður presta – ósk um vitnisburð fyrir dómi:

Rætt tilvik þar sem kalla átti prest fyrir héraðsdóm sem vitni eftir að viðkomandi hafði átt trúnaðarsamtöl og sáttasamtöl við málsaðila í máli sem upp kom í hans söfnuði. Með tilvísun í 8.kafla laga nr. 19/1991, 55.gr. og með hliðsjón af ríkri trúnaðar- og þagnarskyldu presta varð niðurstaða sú að umræddur prestur bæri ekki vitni.

5. Staða mála í Tjarnaprestakalli:

Staða sr. Carlosar hefur verið auglýst og er hann einn umsækjenda. Enn er beðið álits Umboðsmanns Alþingis.

6. Önnur mál:

a. Ákveðið að næsti stjórnarfundur verði haldinn á æskuslóðum kjaramálafulltrúa norður í Miðfirði þriðjudaginn 4.september.

b. Varaformaður sat fund er fjallaði um endurmenntun og símentun presta. Rætt ma. um tveggja vikna sumarskóla í Skálholti sem gæti gefið einingar inn í mastersnám. Einnig voru ræddar hugmyndir um seminar sem haldið yrði í beinu framhaldi Þrettándaakademíunnar. Samþykkt að fara af stað með fyrsta seminarið í janúar 2008 í tengslum við Þrettándaakademíuna.

Fleira ekki gert og fundi slitið kl. 17:00.

Stjórnarfundur P.Í. 8. maí 2007

Fundur í PÍ í Grensáskirkju þriðjudaginn 8.maí 2007 kl. 14.15.

Formaður Ólafur Jóhannsson setti fund með ritningarorði og bæn.
Verkaskipting stjórnar:

Formaður verður áfram sr. Ólafur Jóhannsson, varaformaður sr. Sigrún Óskarsdóttir, ritari sr. Ingileif Malmberg, gjaldkeri sr. Magnús B.Björnsson, kjaramálafulltrúi sr. Magnús Magnússon.

Fundartími og störf stjórnar á starfsárinu:

Ákveðið að fundir verði haldnir að jafnaði fyrsta fimmtudag í mánuði hverjum, næsti fundur fyrirhugaður þann 7.júní n.k...

Að loknum aðalfundi.

Sr. Hreinn Hákonarson fráfarandi ritari mun innan tíðar skila af sér fundargerð frá aðalfundi PÍ sem haldinn var á Húsavík þann 24.apríl 2007.

Rætt um siðareglur PÍ og samþykktar breytingar á þeim, að þær yrðu prentaðar í endurskoðaðri mynd og sendar út til félagsmanna um leið og símaskrá PÍ liggur fyrir. Fram kom ánægja stjórnar með fundarstjórn á aðalfundinum.

Sr. Carlos og staða mála í Tjarnarprestakalli.

Fram kom að beðið er umsagnar umboðsmanns Alþingis. Staða sóknarprests í Tjarnarprestakalli hefur þegar verið auglýst. Umræður hvort ekki hefði verið eðlilegt að bíða úrskurðar umboðsmanns Alþingis. Formaður fylgist náið með gangi máli. Ákveðið var að stjórn PÍ styddi sr. Carlos í viðræðum við kirkjustjórnina um framhald sinna mála.

Ýmis erindi og önnur mál:

Bréf Djáknafélags Íslands. Stjórn hefur borist bréf frá Djáknafélagi Íslands þar sem þess er óskað að félagið verði ekki lengur með aukaaðild að PÍ eins og ráð er fyrir gert í núverandi lögum. Samþykkt að breytingartillaga á þessum lögum verði borin upp á næsta aðalfund PÍ.

Fulltrúi PÍ í Orlofssjóði BHM. Núverandi fulltrúi sjóðsins sr. Jón Helgi Þórarinsson hefur óskað eftir því að vera leystur frá störfum. Sr. Sigfús Kristjánsson hefur tekið að sér að vera næsti fulltrúi stjórnar í OBHM.

Ný prófskírteini frá guðfræðideild HÍ. Erindi sr.Önundar Björnssonar vegna vandamála með að fá fullmetið guðfræðinámið frá HÍ er hann hugðist stunda framhaldsnám í USA. Erindinu var vísað til Guðfræðideildar og komið var svar frá dr. Hjalta Hugsasyni. Þar sem mismunandi kerfi eru í gangi milli hinna ýmsu skóla verður aldrei hægt að samræma þetta með stöðluðu bréfi, heldur verður að skoða hvert erindi sérstaklega. Verið er að skoða hvort unnt sé að gera eitt staðlað bréf þar sem inntaki cand.theol.gráðu er lýst.

NPS-fundur í Osló 14.-16.maí. Formaður og varaformaður halda utan og sitja fundinn fyrir hönd PÍ.

Kjaramál. Nýr kjaramálafulltrúi fór yfir stöðuna og hugmyndir um ný sóknarfæri. Kjaramál verða rædd nánar á næsta stjórnarfundi PÍ.

Viðræður við kirkjuráð um breytingar, sbr. umræðu á synódus. Fulltrúar frá kirkjuráði, sr. Kristján Björnsson og Guðmundur Þór Guðmundsson mættu á fundinn.

Fimm ára ráðningin. Eins og kynnt var á synódus er kirkjuráð búið að vinna að breytingum sem unnt er að fá fram innan lagarammans. Áhersla er lögð á andmælarétt prestsins frá fyrstu stigum, rökstudda tillögu sóknarbarna, að prestur fái að sitja safnaðarfundi, en víki af fundi er hann hefur fengið að útskýra mál sitt og eins að fá fram formlegt sáttaferli.
Embættiskostnaður og ökutækjastyrkur. Stjórnin telur brýnt að fá meira fé til þess að embættiskostnaður og ökutækjastyrkur haldi í við almennar hækkanir. Fram kom að húsaleiga á prestsetrum hefur hækkað í samræmi við fasteignamat og er það í engu samræmi við launahækkanir presta og á sumum svæðum veruleg hækkun sem kemur beint niður á kjörum presta sem þar búa. Sú hugmynd kom fram hvort hægt væri að láta embættiskostnaðinn renna uppí húsaleiguna. Stjórnin er hlynnt kerfisbreytingu á embættiskostnaði og ökutækjastyrk og er reiðubúin að vinna áfram með kirkjuráði að þeim hugmyndum.
Fermingarfræðslugjaldið. Stjórnin lagði áherslu á að ræða þyrfti betur um fyrirkomulag á fermingarfræðslugjaldi og að sú umræða tengdist ekki umræðunni um embættiskostnað. Vilji er af beggja hálfu að skoða leiðir til breytinga á núverandi kerfi.

Fleira ekki gert og fundi slitið kl. 17.30

Siðareglur P.Í. og reglur um siðanefnd

Siðareglur Prestafélags Íslands

1. Inngangur

1.1 Þetta eru siðareglur presta, sem vígðir hafa verið til hins heilaga prests- og prédikunarembættis innan þjóðkirkju Íslands og presta annarra kristinna trúfélaga sem eru meðlimir í Prestafélagi Íslands. Þær eru ætlaðar þeim til stuðnings og leiðbeiningar í þjónustu við Guð og menn.

1.2. Siðareglurnar eiga að efla starfsmetnað stéttarinnar og stuðla að auknu samstarfi og samkennd hennar.

2. Köllun

2.1 Prestsembættið er sett af Drottni og er ómissandi þáttur í lífi kristinnar kirkju og köllun hennar, að boða Krist og útbreiða ríki hans. Prestsembættið sprettur upp úr hinum almenna prestsdómi allra skírðra sem kallaðir eru til að þjóna Drottni og vitna um hann í lífi sínu og starfi.

Prestur er sá sem er réttilega kallaður í kirkjunni til þjónustu orðs og sakramenta og er vígður til hennar. Prestsvígslan fyrir bæn og handayfirlagningu veitir umboð til þeirrar þjónustu innan evangelísk-lúterskrar kirkju eins og vígslubréf kveður á um.

Prestur er þjónn og hirðir safnaðarins, en er ekki starfsmaður hans.

2.2 Grundvallarregla allra mannlegra samskipta er gullna reglan: „Allt sem þér viljið, að aðrir menn gjöri yður, það skuluð þér og þeim gjöra.“ (Matt. 7.12.) Prestar vilja umfram allt hafa þá reglu að leiðarljósi.

2.3 Prestsvígslan leggur prestum sérstakar skyldur á herðar í afstöðu og viðmóti við aðra. Presturinn gerir sér því far um að mæta hverjum einstaklingi í kærleika Krists með virðingu eftir því sem skilningur hans og samviska bjóða hverju sinni. Hann ber og sérstaka ábyrgð gagnvart þeim sem minna mega sín og standa höllum fæti í tilverunni.

2.4 Sálgæsla byggist á virðingu og trúnaðartrausti og er því sérstaklega viðkvæm og vandmeðfarin. Prestur má ekki undir neinum kringumstæðum misnota aðstöðu sína sem sálusorgari eða ógna velferð skjólstæðings, s.s. með kynferðislegri áreitni, né vanvirða tilfinningar hans og tiltrú með öðrum hætti.

2.5 Prestur notfærir sér ekki vitneskju eða tengsl sem hann öðlast við störf sín í ábata- eða hagsmunaskyni.

2.6 Prestur fer ekki í manngreinarálit og veitir fólki sálgæslu og kirkjulega þjónustu eftir því sem við á.

2.7 Prestur innir ekki af hendi prestsþjónustu við athafnir sem ekki samrýmast helgisiðum eða boðun þjóðkirkjunnar eða sem hann treystir sér ekki til að sinna samvisku sinnar vegna.

2.8 Prestur sýnir jafnan trú og siðum annarra umburðarlyndi og forstöðumönnum og prestum annarra trúfélaga og kirkjudeilda virðingu.

2.9 Prestur ber ábyrgð á að rækja embætti sitt eftir gildandi lögum og kirkjusiðum. Hann er fulltrúi kirkju sinnar og stéttar. Hann gætir þess í starfi og einkalífi að hafa virðingu kirkjunnar og sóma stéttarinnar í heiðri.

2.10 Prestur innir jafnan embættisþjónustu sína af hendi í samræmi við gildandi helgisiði og hefðir þjóðkirkjunnar og leitar leyfis biskups til frávika frá þeim.

2.11 Prestur sinnir af kostgæfni öðrum þeim verkefnum sem gildandi lög eða reglur kveða á um eða sem biskup felur honum á hendur, enda rúmist þau innan embættisþóknunar.

2.12 Prestur tekur ekki að sér aukastörf sem skert geta sjálfstæði hans og frelsi til þeirrar helgu þjónustu sem vígslubréf og vígsluheit leggja honum á herðar.

3. Saman að einu marki

Ákvæði um skyldur gagnvart starfssystkinum

3.1 Prestar virða starfsvettvang hver annars og stuðla að góðu samstarfi og samkennd fremur en samkeppni innan stéttarinnar. Þeir sýna hver öðrum heilindi og virðingu í viðtali sem umtali, ráðum og gjörðum.

3.2 Þar sem fleiri en einn prestur starfa saman skulu þeir skipta með sér verkum í samráði við prófast. Verði ágreiningur milli presta skal leggja málið fyrir prófast og ef þörf krefur vísa því til biskups til úrskurðar.

3.3 Prestar vinna embættisverk fyrir starfssystkin sín án þess að krefja þau um greiðslu.

3.4 Þegar prestur sækir um embætti eða starf sýnir hann öðrum umsækjendum fyllstu tillitssemi og samstöðu Þegar prestur lætur af embætti hlutast hann ekki til um hver umsækjenda er valinn í hans stað.

3.5 Prestur gætir þess að eiga gott samstarf við samstarfsfólk sitt, sóknarnefndir og tilsjónarmenn og leitast við að stuðla að eindrægni og samhug.

3.6 Prestur gætir þess að vera málefnalegur og gætir varkárni í ummælum um kenningarleg og guðfræðileg mál, hvort sem er í samræðum eða opinberlega.

4. Trúnaður

Ákvæði um þagnarskylduna

4.1 Prestur er bundinn þagnarskyldu um allt er hann verður áskynja í starfi og leynt skal fara. Í sálgæslu og skriftum er prestur áheyrandi í Krists stað. Þess sem hann verður þannig áskynja má hann því aldrei láta uppi án samþykkis viðkomandi skjólstæðings. Presti ber að fylgja samviska sinni og sannfæringu.

4.2 Þegar prestur leitar sér faglegrar ráðgjafar eða handleiðslu varðandi mál sem hann hefur eða hefur haft með höndum, gætir hann þess að ákvæði þagnarskyldu séu virt.

4.3 Noti prestur dæmi úr starfi í ræðu eða riti skal hann sjá til þess að þau séu órekjanleg.

Samþykkt á aðalfundi Prestafélags Íslands á Húsavík 24. apríl 2007

Reglur um Siðanefnd Prestafélags Íslands

1. Stjórn Prestafélags Íslands (P.Í.) skipar siðanefnd P.Í. Í henni sitja þrír fulltrúar, skipaðir til fjögurra ára í senn. Stjórn P.Í. velur einn, sem skal vera formaður, og fer þess á leit við biskup Íslands, að hann tilnefni einn og við Siðfræðistofnun Háskóla Íslands að hún tilnefni annan. Þessir sömu aðilar tilnefna einnig jafn marga varamenn. P.Í. kostar störf siðanefndar.

2. Hver sá sem telur að prestur hafi brotið framangreindar siðareglur getur kært til siðanefndar. Siðanefnd tekur aðeins fyrir mál sem henni berast skriflega. Jafnframt skal siðanefnd afgreiða öll mál skriflega. Siðanefnd er heimilt að vísa máli frá með rökstuðningi sjái hún ástæðu til.

3. Siðanefnd gætir þess að fyllsta trúnaðar og nafnleyndar sé gætt varðandi öll málsgögn og samtöl vegna meðferðar mála.

4. Siðanefnd metur hvort einhver nefndarmanna sé vanhæfur til að fjalla um kærumál vegna tengsla við kæranda eða kærðu. Sé nefndarmaður úrskurðaður vanhæfur til að fjalla um mál skal varamaður taka sæti hans. Sé hann einnig vanhæfur skal leita eftir tilnefningu stjórnar P.Í.

5. Siðanefnd heldur gjörðabók og starfar á grundvelli siðareglna P.Í. Aðilum máls skal boðið að mæta fyrir siðanefnd til að útskýra mál sitt, ávirðingar og varnir. Undir öllum kringumstæðum skulu hlutaðeigandi málsaðilar leggja fram skriflegar greinargerðir. Kæranda skal heimilt að draga kæru sína til baka hvenær sem er áður en siðanefndarmenn hafa undirritað úrskurð. Siðanefnd skal taka mál fyrir svo fljótt sem auðið er og hraða eftir föngum úrskurði sínum. Ef siðanefnd er ekki einhuga um úrskurð skal meirihlutaálit ráða niðurstöðu. Siðanefnd er skylt að ná fram niðurstöðu og má ekki víkja frá máli fyrr.

6. Hafi sá er kærður er verið félagsmaður P.Í. þegar meint brot er talið hafa verið framið, þá skal siðanefnd P.Í. fjalla um málið. Ef kæra reynist á rökum reist skal siðanefnd kveða skýrt á um hvort brotið var ámælisvert, alvarlegt eða mjög alvarlegt. Ef brot er ámælisvert skal siðanefnd veita viðkomandi presti áminningu. Ef brotið er alvarlegt eða mjög alvarlegt vísar siðanefnd málinu til stjórnar P.Í. ásamt áliti sínu. Stjórn félagsins tekur ákvörðun um hvort vísa skuli viðkomandi úr félaginu. Í öllum tilvikum skulu málsaðilum, stjórn P.Í. , biskupi Íslands og vígslubiskupum kynntar álitsgerðir siðanefndar.

7. Stjórn P.Í. er heimilt að fengnu samþykki siðanefndar að birta niðurstöður eða álitsgerðir siðanefndar eftir því sem þurfa þykir

8. Siðanefnd skal vera vakandi fyrir þeim ágöllum sem vera kunna á siðareglum þessum og leggja fyrir stjórn P.Í. tillögur um breytingar á þeim ef þurfa þykir.

Samþykkt á aðalfundi Prestafélags Íslands á Húsavík 24. apríl 2007

Aðalfundur Prestafélags Íslands 2007

Aðalfundur Prestafélags Íslands, haldinn á Fosshóteli á Húsavík 24. apríl 2007.

Fundurinn hófst á því að fundarmenn sungu Í bljúgri bæn og síðan fóru allir með 23. Davíðssálm. Þá var farið með bæn. Setti formaður að því búnu fund. Lagði hann til að þeir sr. Þorgrímur Daníelsson og sr. Jón Helgi Þórarinsson yrðu fundarstjórar og sr. Hreinn S. Hákonarson ritari fundarins.

Sr. Þorgrímur Daníelsson, fundarstjóri, sté í pontu og bauð fundarmenn velkomna. Gaf síðan sr. Ólafi Jóhannssyni orðið til að flytja skýrslu stjórnar. Umræður verða um skýrslu stjórnar í heild sinni í lok framsögu formanns, kjaramálafulltrúa og gjaldkera.

Skýrsla formanns

Formaður tók til máls og minnti á að skýrsla stjórnar hefði verið send með góðum fyrirvara til félagsmanna. Fór hann síðan í fám orðum um almenn störf stjórnarinnar frá síðasta aðalfundi sem haldinn var í safnaðarheimili Keflavíkurkirkju. Nefndi þar helst breytingar á lögum félagsins. Þá þakkaði hann stjórninni fyrir gott samstarf á liðnu starfsári sem og frú Eddu Möller, framkvæmdastjóra P.Í. Jafnframt þakkaði hann hinum fjölmörgu félagsmönnum sem sinnt hafa afmörkuðum verkefnum á vettvangi P.Í. eða sem fulltrúar félagsins út á við.

Síðan vék hann að kjaramálum og vísaði ennfremur til skýrslu kjaramálafulltrúa sem send var félagsmönnum í netpósti.

Um kjaramál sagði hann:

a) Í febrúar s.l. kvað kjararáð upp úrskurð um að ráðið myndi eftirleiðis úrskurða um laun þess hluta prestastéttarinnar sem fær laun greidd á grundvelli samnings ríkis og kirkju.

b) Taldi miður að ekkert hefði ræst úr varðandi kjaramál sjúkrahúspresta á LSH sem ráðnir eru af stjórn sjúkrahússins – þeir eru ekki innan samnings ríkis og kirkju og fá ekki greidd laun skv. úrskurði kjararáðs.

c) Í árslok 2006 kvað kjararáð upp úrskurð um að ríkið greiði í Styrktarsjóð BHM fyrir þá embættismenn sem heyra undir ráðið. Þessi úrskurður byggir á samkomulagi við BHM um að embættismenn utan BHM geti með þessum hætti orðið aðilar að Styrktarsjóði BHM í stað þess að stofna hefði þurft sérstakan styrktarsjóð embættismanna. Markmið sjóðsins er m.a. að bæta útgjöld vegna ýmiss konar heilbrigðisþjónustu og óvæntra áfalla sjóðfélaga. Benti á að nánari upplýsingar um BHM væri hægt að sjá á heimasíðu BHM (www.bhm.is).

d) Minnti á að Starfsmenntasjóður BHM (STRIB) styður félaga í P.Í. til að sækja m. námskeið og ráðstefnur. Hægt er að fá styrki til ferða og ráðstefnu- og námskeiðs-gjalda, auk gistikostnaðar. Hvatti hann presta til að notfæra sér sjóð þenna.

e) Greindi frá því að stjórn P.Í. hefði vakið athygli kirkjustjórnarinnar á því að greiddur ökutækjastyrkur til presta hefur dregist aftur úr viðurkenndum kostnaði við rekstur ökutækja. Greiðslur embættiskostnaðar hafa einnig rýrnað en þó ekki eins mikið. Á sama tíma hefur komið fram vilji margra presta til að breyta tilhögun greiðslna vegna fermingarundirbúnings. – Kirkjustjórnin hefur boðið stjórn P.Í. til viðræðna um breytt fyrirkomulag um greiðslur allra þessara liða og lagt fram hugmynd um útfærslu í nýju kerfi. Stjórn P.Í. leggur áherslu á að nýtt fyrirkomulag rýri í engu núverandi greiðslur til presta en þvert á móti þurfi í mörgum tilvikum að hækka þær, einkum greiðslur vegna aksturs.

f) Kirkjuþing 2006 breytti starfsreglum um prestssetur, m. a. varðandi meðferð hlunnindatekna. Ætti nú að vera úr sögunni ágreiningur um skiptingu hlunnindatekna þegar nýr sóknarprestur tekur við prestakalli. – Þá var reglum um skipun í stjórn Prestssetrasjóðs breytt í þá veru að P.Í. skipi framvegis einn fulltrúa í stjórn. Í kjölfarið hefur vaknað umræða um hvort eðlilegt sé og æskilegt að prestur sitji í stjórn sjóðsins eða hvort prestur hljóti stöðu sinnar vegna iðulega að vera vanhæfur til ákvarðana um málefni prestssetranna og því þurfi P.Í. að skipa einhvern annan en prest í stjórnina, t. d. lögfræðing.

Stjórn P.Í. óskaði eftir því við kirkjustjórnina að tekið væri saman yfirlit yfir ýmis réttindi presta varðandi fæðingarorlof, veikindaleyfi o. fl. atriði sem gagnlegt er að eiga á einum stað. Skrifstofustjóri Biskupsstofu hefur unnið að handbók með ýmsum slíkum upplýsingum. Handbók um réttindi og skyldur presta má sjá á slóðinni: http://kirkjan.is/skjol/lagaleg_rettindi_handbok.pdf

Formaður vék því næst að fimm ára skipunartímanum en nú í vetur reyndi í fyrsta sinn á ákvæði 40. gr. þjóðkirkjulaganna nr. 78/1997 Rakti hann í stórum dráttum málsatvik í Tjarnarprestakalli en þar fór safnaðarfundur Kálfatjarnarsóknar fram á að auglýst yrði að nýju þegar fimm ára skipunartími sitjandi sóknarprests rynni út. Stærri sóknin í kallinu felldi tillögu sama efnis. Samþykkt safnaðarfundar Kálfatjarnarsóknar kom inn á borð úrskurðarnefndar, biskups, valnefndar og ráðherra.

Velti formaður því fyrir sér hvort framkvæmd laganna væri í samhljóðan við það sem menn hefðu haft í huga þá þau voru samþykkt. Einnig taldi hann aðkomu úrskurðarnefndar vekja undrun en hún virtist einungis telja sér ætlað að tjá sig um hvort rétt hafi verið farið að í framkvæmd ferlisins en ekki hvort málefnalegar ástæður hefðu verið fyrir því að auglýsa embættið. Formaður benti einnig á að valnefnd prestakallsins hefði verið valin í miðju ferlinu og taldi það furðu sæta. Slíkt væri í hrópandi ósamræmi við 15. gr. starfsreglna nr. 735/1998 en þar er gert ráð fyrir því að valnefndir í öllum prestaköllum séu fastanefndir, valdar til fjögurra ára strax eftir kosningu meirihluta sóknarnefnda. – Kvað hann félaga P.Í. hljóta að hugsa til sóknarprestsins í Tjarnarprestakalli í þessari orrahríð.

Kirkjuþingsfulltrúum vígðra var sérstaklega boðið á fulltrúaráðsfund P.Í. 15. mars s.l. þar sem þetta mál var til umræðu. Almennt voru fundarmenn á því að breyta þyrfti lögum og/eða starfsreglum áður en fleiri slík tilvik kæmu fram í dagsljósið.

Þá gat formaður þess að mál þetta lægi nú fyrir umboðsmanni Alþingi. Vegna eðlis og sérstöðu málsins hefur stjórn P.Í. veitt sóknarprestinum verulegan fjárstuðning til að mæta lögfræðikostnaði.

Formaður gat þess að vonandi tækist á þessum aðalfundi að afgreiða tillögur að breytingum á siðareglum presta. Málinu var frestað á aðalfundinum í fyrra. Nefndina sem endurskoðaði siðareglur P.Í. skipuðu: Sr. Irma Sjöfn Óskarsdóttir sem var formaður, sr. Birgir Ásgeirsson, sr. Gunnar Rúnar Matthíasson og sr. Úlfar Guðmundsson.

Að síðustu minnti formaður félagsmenn á að á næsta ári myndi P.Í. fagna 90 ára afmæli.

Fundarstjóri gaf kjaramálafulltrúa orðið.

Skýrsla kjaramálafulltrúa

Sr. Kristinn Jens Sigurþórsson, kjaramálafulltrúi P.Í. tók til máls. Minnti hann á að skýrslu sína hefði hann sent til presta í tölvupósti.

Í upphafi máls sín rakti hann í stórum dráttum störf sín allt frá því að hann tók við sem kjaramálafulltrúi árið 2005. Ljóst hefði verið að lítt myndi reka í kjaramálum presta það árið fyrr en að loknum samningum við fjölmarga aðila á vinnumarkaði. Fyrirhugað var í lok þess árs að ganga á fund kjaranefndar og leggja fram tillögur að bættum launakjörum presta. Hafði kjaradómur kveðið upp úrskurð skömmu fyrir jól 2005 um all nokkra launahækkun æðstu embættismönnum til handa. Nokkur urgur varð í samfélaginu vegna þess og sá Alþingi sig knúið til að fella téðan úrskurð Kjaradóms úr gildi frá og með 1. febrúar 2006. Auk þess setti Alþingi lög (nr. 47/2006 – tóku gildi 1. júlí) sem kváðu á um að stofnað skyldi kjararáð sem leysti af hólmi kjaradóm og kjaranefnd. Vegna alls þessa var árið 2006 nokkurs kona biðstaða.

Nýskipað kjararáð tók til starfa í október s.l. Fyrsta verk þess var að úrskurða sjálft um það hverjir skyldu heyra undir það. Rakti kjaramálafulltrúi síðan hvernig P.Í. hefði snúið sér í því máli og þakkaði þétta samstöðu stéttarinnar. Rituðu prestar, prófastar og vígslubiskupar, bréf til kjararáðs og rökstuddu hvers vegna þeir skyldu heyra undir það. Voru bréfin alls 105. Þá var gerð skoðanakönnun um málið meðal presta. Af þeim 167 prestum sem fengu könnunina senda í tölvupósti svöruðu 118 (70,66%) og af þeim voru 117 hlynntir veru félagsmanna undir kjararáðinu, enginn var því mótfallinn, en einn tók ekki afstöðu. Allir sem afstöðu tóku voru því fylgjandi að kjararáð úrskurðaði um laun presta eða 100%.

Kjararáð úrskurðaði svo hinn 13. febrúar s.l. að prestar skyldu heyra undir ráðið. – Taldi kjaramálafulltrúi ljóst að prestar væru ánægðir með niðurstöðu í máli þessu enda þeim vel kunnugt um að stéttinni er illmögulegt að sækja kjör sín og réttindi til jafns á við aðra.

Kjararáð vinnur enn að því að skilgreina hverjir skuli heyra undir það. Lítið hefur hins vegar gerst í kjaramálunum sjálfum. Taldi kjaramálafulltrúi þó að sóknarfæri ættu að vera fyrir presta að fá nokkra launahækkun. Nefndi sérstaklega stjórnunarskyldur þeirra,

vinnutíma og bakvaktaskyldur. Þá næði starf presta nær til nánast allra rauðra daga almanaksins þegar flestir aðrir embættismenn ættu frí.

Síðan vék kjaramálafulltrúi að embættiskostnaði og ökutækjastyrk. Ljóst væri að hvorugt hefði hækkað í samræmi við það sem eðlilegt gæti talist. Vísaði hann til bréfs sem þeir formaður P.Í. rituðu kirkjuráði í júní s.l. Þar var farið fram á verulega hækkun á þessum liðum, þ.e. hækkun í samræmi við hækkun neysluvísitölu og kílómetragjalds. Stjórn P.Í. fær ekki betur séð en að um 10 milljónir króna vanti á ársgrundvelli prestum til handa, svo þeir fái sambærilegan kostnað greiddan og gert var ráð fyrir í ársbyrjun 2001, þegar núgildandi reglur tóku gildi.

Kjaramálafulltrúi sagði afstöðu kirkjuráðs nokkuð skýra í máli þessu en það hefur krafist breytinga á embættiskostnaðarkerfi presta. Einkum hefur því verið þyrnir í augum að prestar á þéttbýlisstöðum, sem hafa skrifstofuaðstöðu í kirkjunum, skuli fá jafnháan embættiskostnað og þeir prestar sem enga slíka aðstöðu hafa. Einnig hefur því verið lýst yfir að ekki yrðu meiri fjármunir settir inn í þetta kerfi, nema því aðeins að breytingar yrðu á því.

Þá greindi kjaramálfulltrúi frá því að stjórn P.Í. hefði verið kölluð á fund fulltrúa lærðra í kirkjuráði og vildu þeir ræða mál þessi. Á þeim fundi var rætt um að allt að 5,6 milljónir yrðu settar inn í þennan málaflokk, en jafnframt unnið að breytingum kerfisins. Var skipaður samstarfshópur af þessu tilefni, skipuðum biskupsritara og lögfræðingi kirkjuráðs auk kjaramálafulltrúa P.Í.

Fundur í þessum samstarfshópi var haldinn 17. apríl s.l. og náðist enginn árangur í málinu. Á fundinum kom í ljós, að einungis 3 milljónir yrðu settar inn í þennan málaflokk en ekki 5,6 eins og áður hafði verið talað um, auk þess sem ljóst mátti vera að þessi nýja skipan mála tæki ekki gildi fyrr en eftir næstu áramót.

(Frammíkall: Sr. Halldór Gunnarsson: Þetta er ekki rétt, herra lögfræðingur).

Fundarstjóri vítti sr. Halldór fyrir frammíkallið.

Kjaramálafulltrúi hélt ræðu sinni áfram:

Kjaramálafulltrúi taldi því ástæðulaust að vinna frekar að málinu á þessu stigi, en áleit hyggilegra að ný stjórn P.Í. færi gaumgæfilega yfir málið. Kappsmál yrði m.a. að fá meiri fjármuni inn í þennan málaflokk á næsta kirkjuþingi.

Því næst ræddi kjaramálafulltrúi málefni prestssetranna. Þau voru býsna mikið rædd á síðasta kirkjuþingi. Gerðar voru m.a. töluverðar breytingar á starfsreglum Prestssetrasjóðs og þar á meðal á leigu þeirri sem prestum, sem eftirleiðis setjast á prestssetursjarðir, er ætlað að greiða.

Greindi kjaramálafulltrúi frá ályktun stjórnar P.Í. fyrir kirkjuþing þar sem þung áhersla var lögð á rétt prestanna til jarðanna og til að þiggja af þeim arð eins og verið hefur frá ómunatíð og dró tvö atriði úr henni:

· Prestssetrið er samkvæmt lögum nr. 137/1993 um prestssetur hluti af embætti prestsins.

· Stjórn P.Í. vill að fram komi það álit hennar, að með lögum nr. 137/1993 um prestssetur sem og nýjum ábúðarlögum nr. 80/2004 hafi framangreind staða presta á engan hátt verið rýrð.

(Sjá nánar fundargerð stjórnar P.Í. 21. ágúst 2006.)

Þessa vildi hann sérstaklega geta vegna þess að stjórn Prestssetrasjóðs væri þegar farin að tala um möguleikann á að selja og undanskilja eitt og annað frá jörðum, sem setnar eru af prestum með tilvísan í ábúðarlög frá 2004 en þar er m.a. kveðið á um rétt eiganda jarðar til að undanskilja sitthvað frá leiguliðaafnotum ábúanda.

Kjaramálafulltrúi sagði það vera sína skoðun að enda þótt lög heimili eigendum jarða að standa með þessum hætti að málum, þá væri ekki þar með sagt að Prestssetrasjóði væri slíkt heimilt. Þó Prestssetrasjóður væri landsdrottinn að lögum þá væri hlutverk hans fyrst og fremst yfirumsjón með prestssetrunum, en prestssetrin eru hluti embættanna.

Taldi kjaramálafulltrúi með vísan til 19. gr. Starfsmannalaga, Prestssetrasjóð a.m.k. ekki hafa heimild til að taka jarðarskika eða hlunnindi undan ábúð þeirra presta, sem þegar hafa fengið embættum úthlutað og gert samninga þar um. Óheimilt væri að breyta réttindum starfsmanna ríkisins þannig að þau skerðist.

Í lokin gat kjaramálafulltrúi um samkomulag sem gert var á milli þjóðkirkjunnar og ríkisins þann 20. október s.l. Þar er getið um að prestssetur þau sem Prestssetrasjóður tók við yfirstjórn frá dóms- og kirkjumálaráðuneytinu í ársbyrjun 1994 séu eign þjóðkirkjunnar og með samkomulaginu sé það staðfest.

Taldi kjaramálafulltrúi ekki auðvelt að átta sig á því hvað fælist í þessu orðalagi. Minnti í þessu sambandi á ályktun P.Í. til síðasta kirkjuþings. (Sjá fundargerð stjórnar P.Í. 25. október 2006.)

Kjaramálafulltrúi lauk máli sínu með þeim orðum að hann myndi vegna námsleyfis næsta vetur ekki sækjast eftir endurkjöri í stjórn P.Í. Þakkaði hann bæði stjórn og stétt fyrir ánægjulegt samstarf á liðnum árum.

Reikningar og fjárhagsáætlun

Sr. Magnús Magnússon, gjaldkeri, sté því næst í pontu og skýrði reikninga félagsins. Varpaði hann fram tveimur stökum í upphafi máls síns:

Fundarstjóri, góðir fundarmenn,

fram við leggjum einu sinni enn

rauntölur um okkar reikningshald

rekstrarfé og einnig félagsgjald.

Aukning tekna átta hundruð þús.,

afkoman úr mínus fór í plús

milljón króna minni rekstrargjöld

má því fagna þegar kemur kvöld.

Ársreikningurinn er undirritaður athugasemdalaust af þeim sr. Írisi Kristjánsdóttur og sr. Pétri Þorsteinssyni en þau eru skoðunarmenn reikninga félagsins.

Rekstrartekjur félagsins voru kr. 6.027.561 en rekstrargjöld kr. 4.370.398 og nam því rekstrarafgangur kr. 1.657.163. Í efnahagsreikningi kemur fram að veltufjármunir voru kr. 4.008.384. Félagið er skuldlaust.

Fjárhagsáætlun ársins 2007 hljóðar upp á kr. 5. 949.000

Þegar gjaldkeri hafði lokið máli sínu gerði fundarstjóri hlé á fundi kl. 12.38 og gengu fundarmenn til snæðings.

Matarhlé dróst og hófst fundur að nýju kl. 13.45. Gaf fundarstjóri orðið laust um skýrslu stjórnar.

Umræður um skýrslu formanns, kjaramálafulltrúa og reikninga

Sr. Halldór Gunnarsson kvað sér fyrstur hljóðs:

Þakkar formanni fyrir skýrslu stjórnar og störf hans. Sömuleiðis þakkar hann gjaldkera fyrir frábæra skýrslu sem borin var fram í ljóði. Þakkar fundarstjóra fyrir að víta sig en sagðist ekki hafa geta hamið sig undir ræðu kjaramálafulltrúa. Taldi betra ef kjaramálafulltrúi hefði flutt hluta af ræðu sinni frá því í fyrra en þá var mikil ólga í nokkrum prestum vegna stöðu prestssetramála. Spurði: Hvað hefur gerst síðan? Málin leyst á kirkjuþingi 20. október en þá var lokið samningum við þjóðkirkjuna um kirkjueignir og prestssetur. Þjóðkirkjan náði fjárhagslegri stöðu sem hann hefði talið eðlilegt að stjórn P.Í. fagnaði. Samningur náðist eftir 100 ár; eignamál kirkjunnar hefðu mikið verið til umræðu frá 1994. Þjóðkirkjan er beneficium, sjálfseignastofnun sjálfseignastofnanna. Kirkjustjórnin setti fram tillögur um embættis- og aksturskostnað sem hann hefði ætlað að stjórn P.Í. myndi kynna á fundinum því í þeim er verið að taka undir tillögur sem formenn P.Í. hafa áður rætt um og beðið. Hafði ekki vitneskju um annað en að stjórn P.Í. tæki undir þær tillögur þó skýrsla kjaramálafulltrúa bæri annnað í sér. Sér málin með öðrum augum en kjaramálafulltrúi og miðað við minnispunkta biskupsritara frá fundi þeirra og kjaramálafulltrúa. Taldi ekki tilefni til að ræða réttarstöðu kirkjunnar hér – kjaramálafulltrúi virðist vera með sólgleraugu þegar hann ræðir þau mál. Sagði að tilefni væri til að fagna um margt og sem elsti starfandi prestur landsins fullyrti hann að staða stéttarinnar hefði aldrei verið betri hvað kjör snertir en einmitt nú. Þá stöðu á eftir að bæta og það vill kirkjustjórnin gera og kalla stjórn P.Í. til samstarfs um það. Telur að samningar um aksturs- og embættiskostnað taki lengri tíma nú sakir þess að stjórn P.Í. kynnti ekki tillögur kirkjustjórnarnarinnar um þau mál.

Fundarstjóri óskar eftir tillögum um önnur mál fyrir kl. 15.30 og þá skriflega.

Sr. Gunnar Sigurjónsson

Þegar prestar eru settir inn í embætti þá eru flutt ákveðin áminningarorð um að þeir skuli taka hvern annan að sér. Þegar prestur fer að sinna embættisskyldum sínum þá er það líkast því eins og þeir séu að taka hvern annan að sér svo sem í hjúskap væri. Miður að ekki er gert ráð fyrir því að í ferlinu fari fram sáttaumleitan. Vonast til þess að ályktun verði samþykkt um fimm ára ráðninguna og að félagar í P.Í. standi saman um hana. Fimm ára ráðningu prests megi ekki ljúka nema fram fari sáttaumleitan.

Sr. Geir Waage

Fagnar því að nú á P.Í. eigi þess kost að tilnefna mann í Prestssetrasjóð. Þegar lögin um Prestssetrasjóð voru sett þá var meginundirbúningur unninn á vegum P.Í. Þar var gert ráð fyrir því að stjórnin ætti fulltrúa í sjóðnum en því breytt að kröfu biskups Íslands þegar það var komið til þingsins. Lagfæring fékkst ekki og ráðherra hótaði að taka málið til baka ef P.Í. og biskup næðu ekki saman. Biskup lofaði samráði um skipan í stjórn Prestssetrasjóð en það var svikið. Eðlilegt er að prestur sitji í stjórn sjóðsins og það er algjörlega nauðsynlegt. Furðulegt tal um að prestur sem situr í sjóðnum sé vanhæfur – það er þvættingur. Ekki vanhæfur nema í því sem snýr að hans eigin prestssetri. Ekki vanhæfur hvað varðar önnur prestssetur. Fagnar því að stjórn P.Í. sé komin með beina aðild að sjóðnum og hvetur stjórnina til þess að sjá til þess að fulltrúi hennar sé vel kunnugur málefnum prestssetra. Fáir í stéttinni sem vita hvað um er að véla þegar um er að ræða kirkjulén.

Saknaði þess að heyra ekki í framsögu stjórnarinnar hvað stéttinni hefði verið boðið varðandi þær breytingar sem kirkjustjórnin vildi gera með embættiskostnað og akstur. Boðið að taka rekstrartekjur embætta út af launaseðli og það eitt er mikið kjaraatriði og þó að ekkert annað hefði fylgt í kaupunum þá hefði átt að stökkva á það. Hvaða breyting á innheimtu fermingargjalda stóð til boða? Hvaða rýrnun hefði orðið á fermingartollinum? (Formaður skýtur því að að nú sé fermingartollur kr. 9.300 en verði samkvæmt tillögum kirkjustjórnarinnar kr. 8. 000 og muni hækka með vísitölu næstu árin en gjaldskrá hækki ekki næstu fimm ár.)

Undrast að ekki skuli hafa verið gengið að þessu.

Um prestsetrin: Réttur eiganda hefur styrkst, staða leiguliða veikst. Vill ekki að prestar noti orðið leiguliðar um presta á prestssetrum. Prestssetrasjóður er ekki landeigandi. Hvað áhrærir hvaða skilning beri að leggja í að prestssetrin séu eign þjóðkirkjunnar þá sé það algjörlega undir stéttinni komið hvernig túlka skuli.

Sr. Úlfar Guðmundsson

Er fyrsti presturinn sem sat í stjórn Prestssetrasjóðs. Fann að hann átti fullt erindi í stjórninni sem prestur og hafandi verið í embættisbústað. Gat þess að hann harmaði niðurstöðu prestssetramála á Þingvöllum. Sættir sig ekki við að prestssetrinu þar hafi verið breytt í kokteilstofu hins opinbera.

Sr, Kristján Björnsson.

Fagnar því að P.Í. sé komið með aðild að styrktarsjóð BHM. – Gott að fá fram tillögu um sáttaferli í sambandi við framkvæmd á fimm ára ráðningunni. Taldi skýrslu kjaramálafulltrúa undarlega lesningu þar sem vikið væri að fundi sem haldinn var með fulltrúum kirkjustjórnarinnar og stjórn P.Í. Sagðist hafa skilið mál svo fyrst að stjórn P.Í. hafi ákveðið að tilnefna fulltrúa til viðræðu þá hafi hún fallist á meginrök og hugmyndir kirkjustjórnarinnar – og út frá þeim skyldi unnið. Sagðist skilja þetta svo að um samráðsvettvang væri að ræða enda væri ekki verið að ræða um kaup og kjör heldur um fyrirkomulag á greiðslu kostnaðar í sambandi við akstur og embættisrekstur. Nefndi starfsreglur um það hvernig haga skyldi greiðslu á embættiskostnaði – væru það breytingar frá því sem nú væri – og sagðist vera sáttur við þær. Óskaði eftir því að ný stjórn P.Í. myndi vinna að þessum tillögum þannig að hægt yrði að greiða eftir þessu nýja kerfi frá og með áramótum. – Ánægður með hvernig tókst til með að koma stéttinni undir kjararáð.

Sr. Lena Rós Matthíasdóttir

Ræddi sérstaklega fimm ára ráðningarferlið í tengslum við mál sr. Carlosar A. Ferrers. Bjó sjálf í Vogum á Vatnsleysuströnd, sat m.a. þar í hreppsnefnd, og greindi frá því

hvernig þetta samfélag hefði komið sér fyrir augu bæði fyrir tíma nefnds sóknarprests og eftir. Sagði sóknarnefnarformann vera sem kóng í sókninni. Rakti hún ýmis vandkvæði í starfi þar vegna ráðríkis ýmissa manna. Hefðu ýmsar kviksögur farið á kreik um prest og kirkjustarf sem hún vildi leiðrétta. Þá væri það ljóst í hennar huga að erfitt væri að þjóna annexíu sem Kálfatjarnarsókn út frá svo stórri sókn sem Ástjarnarsókn væri. Taldi hún sr. Carlos hafa unnið gott starf í kallinu og væri harla ósátt með hvernig mál hefðu æxlast.

Fundarstjóri vildi minna fundarmenn á að vandasamt væri að ræða mál manna sem ekki væru staddir á fundi.

Sr. Gísli Jónasson

Ræddi um breytingar á innheimtu fermingartolls. Tillögur sem kynntar voru fyrir próföstum gera ráð fyrir því að héraðssjóðir leggi til 20% og er ljóst að þá eigi að blóðmjólka og skerða getu þeirra til að vinna að málum heima í héraði. Styður ekki þessa útfærslu og segir fleiri vera sama sinnis. Þetta er ekki einfalt mál. Telur sjálfur að heppilegra væri að innheimta fermingargjald með öðrum hætti en nú er en ekki með því að seilast í hérðassjóðina.

Sr. Solveig Lára Guðmundsdóttir

Ræddi akstursmál og sagðist hafa vikið að því á mörgum aðalfundum. Er orðin óþreyjufull að sjá breytingu á þeim málum sem eru vissulega í lamasessi þegar prestar eru hreinlega að greiða með akstrinum í hverjum einasta mánuði. Brýnir stjórn P.Í. til að breyta þessu til réttláts horfs og þakkar jafnframt fyrir það sem gott er gert. – Prestssetursmál: Beinir orðum til þeirra sem ekki sitja prestssetur. Fannst málið ekki koma sér við í átján ár þá hún þjónaði í Reykjavík og á Seltjarnarnesi. Nú hefur hún búið í prestssetri í sjö ár og leggur þunga áherslu á að prestssetrin séu gríðarlega þýðingarmikil í öllu tilliti. Mikilvægt að hennar mati að prestur á prestssetri sitji í stjórn Prestssetrasjóðs.

Sr. Magnús Magnússon

Vék að fundi stjórnar P.Í. með lærðum kirkuráðsmönnum og embættismönnum Biskupsstofu um aksturs- og embættiskostnað sem og breytt fyrirkomulag á greiðslu á fermingartolli. Þetta var kynningarfundur og stjórn P.Í. hlustaði og setti sig inn í málið. Stjórnin samþykkti ekki neitt á fundinum nema það að skipa mann í starfshóp um málið. Þegar í ljós kom að viðbótargreiðsla var ekki kr. 5,6 milljónir heldur um þrjár milljónir var talið ráðlegt að fresta umræðunni enda aðalfundur P.Í. á næsta leiti og þar gæfist tími til að skoða málið og heyra sjónarmið félagsmanna.

Sr. Kristinn Jens Sigurþórsson

Minnti að embættiskostnaðar- og akstursmálin sem og fyrirkomulag innheimtu fermingargjalds yrðu til umræðu á stefnunni og væri því óþarft að kynna þau sérstaklega á aðalfundi P.Í. Ljóst að ekki væru allir sammála um leiðina að markinu og hvernig yrði tekið á þessu gagnvart héraðssjóðum enda ættu þeir eftir að láta skoðun sína í ljós. – Ræddi um færslu á ökutækjastyrk og embættiskostnaði á launaseðli og taldi ekki skipta máli í hvaða reitt þetta færi því alltaf væri um kostnað að ræða. Biskupsstofa ætti að geta aðgreint þetta á seðlinum. Lýsti ánægju sinni með að heyra frá mönnum að kjör stéttarinnar hefðu aldrei verið betri en nú. Þó væri ljóst að embættiskostnaðargreiðslur hefðu aldrei verið lakari og reynt hefði verið að berjast fyrir hækkun á þeim. Nefnt hefði verið að bæta þremur millljónum við þessar greiðslur þegar í raun og veru þyrftu að koma til um tíu milljónir að mati P.Í. Með þetta í huga hefði stjórn P.Í. talið að ekkert lægi á. Hvetur kirkjuþingsfulltrúa til að berjast fyrir því að meiri fjármunum verði veitt í þessa liði enda sé full þörf á því þar sem margir greiði með embættum sínum.

Ræddi eignarhald á prestssetrum. Hefur rætt við forseta kirkjuþings um orðalag í samningnum frá 20. október s.l. þar sem sagt er að kirkjujarðir og prestssetur séu eign þjóðkirkjunnar. Taldi ræðumaður að orðalagið eign þjóðkirkjunnar fæli í sér róttæka eignatilfærslu.

Sr. Gunnar Rúnar Matthíasson

Taldi mikilvægt að félagið styddi við bakið á félaga sem stæði höllum fæti, sr. Carlosi A. Ferrer. Bendir á mikilvægi handleiðslu í málum af þessu tagi og að hún komi inn á réttum tíma. Handleiðsla og sáttaferli hefði átt að koma til þegar málið kraumaði. Fagnar því að sett verði undir þennan leka með tillögu að breyttum starfssreglum. Mikilvægt að vera vakandi yfir starfsöryggi stéttarinnar svo órökstuddar ávirðingar og dylgjur valdi ekki starfsmissi. Brýnir félaga til að standa vörð um hagsmuni hvers annars. Mál af þessu tagi má ekki skjóta aftur upp kolli.

Sr. Cecil Haraldsson

Sagðist hafa verið kominn á fremsta hlunn með að greiða atkvæði gegn því að félagar í P.Í. færu undir kjararáð. Ákvað þó að greiða atkvæði með því. Telur að stéttin eigi kaup að sækja á einn stað og kjör á annan. Kjararáðið vinnur væntanlega að því að móta sér hugmyndir um það sem undir það heyrir, hvað það eigi að meta og hvernig. Nú er tími til að fara fyrir kjararáð og segja hvað okkur finnist að eigi að koma fram.

Vill sinna starfi þar sem hann fær laun frá einum launagreiðanda. Vill afnema aukaverk, vill laun fyrir allt starfið. Miður að sjá frá stjórn P.Í. á sínum tíma orðalag um að menn vildu ekki mismuna embættum eftir stærð þá launakjör væru ákvörðuð. Þetta hefur verið í það minnsta rætt tvisvar á aðalfundi P.Í. Niðurstaðan sú að það væri í lagi að hafa þetta sem hann kallar hreina og klára mismunun. Brýni næstu stjórn að vinna vel að þessu mál. Sagði sögu af því að þá hann varð eitt sinn veikur á laugardegi og fékk prest til að þjóna fyrir sig á sunnudeginum. Spurði Biskupsstofu að því hvert hann ætti að senda reikninginn og fékk það svar að prestar jöfnuðu slíkum tilvikum á milli sín. Taldi þetta dapurlegt viðhorf og svo væri litið á að hann í þessu tilviki ætti að vinna af sér veikindin. – Ræddi síðan kostnað við það að sækja prestastefnu á Húsavík og taldi erfitt að sækja kjör sín til þjóðkirkjunnar. Ekki ánægður með framkomnar tillögur um embættis- og aksturskostnað og gagnrýnir að haft sé í hyggju að taka úr héraðssjóðum til þessa.

Sr. Sigríður Guðmarsdóttir

Sagðist vilja endurtaka orð sín frá því í fyrra á aðalfundinum í Keflavík þess efnis að of naumur tími sé gefinn fyrir aðalfund félagsins. Fundurinn sé mjög mikilvægur og honum séu þröngar tímaskorður settar. Þá hefði hún viljað hafa skýrslu formanns ítarlegri á fundinum – þá munnlegu. – Þakkar skýrslu kjaramálafulltrúa. – Telur fulla þörf á því að ræða málefni prestssetra á fundinum þar sem þetta séu kjör margra og því sé mikilvægt að ræða þau. – Tæpir á málum ónefnds prests í Kjalarnessprófastsdæmi. Lýsir yfir hryggð sinni með þetta mál – að hann skuli vera að missa embættið vegna fólks sem krefst þess að embættið sé auglýst og það þurfi aldrei að rökstyðja sitt mál. Vill í lokin benda á að enda þótt ræða eigi breyttar reglur í sambandi við fimm ára ráðninguna sé ljóst að félagsmaður í P.Í. standi frammi fyrir því að missa embætti sitt, missa framfærslu sína. Þörf sé á að styðja bróður í vanda.

Sr. Geir G. Waage

Þakkar svörin sem komið hafa fram á fundinum – þó fæst frá stjórnarmönnum. Kom fram að verið væri að vinna með þá hugmynd að breyta akstursfyrirkomulagi (vinna meira í einingum), út frá fjölda sókna og annarra staða í kallinu sem prestur sinnir. Þetta telur hann vera forsendu þess að hægt sé að ná akstursgreiðslum upp enda hafi hann verið frá öndverðu greiddur eftir einhverjum áætlunum. Skipta verður kostnaði niður í einingar að hans mati og miða við akstur sem sannanlega er í látinn í té. – Fermingartollur: Fimmtungur á að koma úr héraðssjóðum samkvæmt tillögunum. Má vel vera að á þeim vettvangi myndi hann bregðast öðruvísi við þar sem hann á sæti í héraðsnefnd. Það sé hins vegar ekki mál P.Í. hvaðan peningarnir komi. Málið er hvort stéttin fellur sig við þessa breytingu eða ekki. Spyr: Hve margir fermingartollar eru þannig að presti dettur ekki í hug að innheima vegna aðstæðna foreldra? Hvað með prestana í sveitunum þar sem aldrei er boðin greiðsla og ekki rukkað fyrir? Segir þessar tillögur ekki vera kjaraskerðingu. Héraðssjóðir geyma fé safnaðanna og fermingarfræðslan sé skírnarfræðsla. Þess vegna er sjálfsagt og eðlilegt að þeir greiði fyrir hana. Nefnir að fé úr héraðssjóðum hafi verið notað með ýmsum hætti og greitt útgjöld vegna presta – það sé misnotkun. Vilji prestar til að mynda sækja sér endurmenntun þá má ekki gleymast að þeir séu aðilar að endurmenntunarsjóði. Það á ekki að sækja í sjóði safnaðanna. – Tekur undir þau orð sem fallið hafa til stuðnings sóknarprestinum í Tjarnarprestakalli því verið sé að brjóta á honum. Þakkar stjórninni fyrir það sem hún hefur gert í því máli.

Sr. Lára Oddsdóttir

Nefnir að hún vilji einnig sjá í tillögum þessum greiðslur fyrir skírnir. Standi þá aðeins eftir að prestar innheimti fyrir hjónavígslur. Styður það eindregið að prestur sitji í stjórn Prestssetrasjóðs enda hafi hún sjálf setið í stjórninni á sínum tíma. Leggur áherslu á að prestssbústaðurinn sé skjól prestsfjölskyldunnar.

Sr. Halldór Gunnarsson

Tekur undir orð varðandi mál sóknarprestsins í Tjarnarprestakalli. Ljóst að þeir sem stóðu að lagasmíð þjóðkirkjulaga hafi ekki séð fyrir þá framvindu sem varð hvað snertir útfærslu á 40. gr. þjóðkirkjulaganna. Sú lagagrein er augljóslega ekki þannig að við hana verði unað. – Sagði að kirkjuþingsmenn hefðu brugðist í því að hafa ekki sett starfsreglur um málsmeðferðina og bað hann sr. Carlos afsökunar á því. Nú þyrfti að horfast í augu við það sem orðið væri og gera sem best úr því. – Ósammála ræðu sr. Cecils og kjaramálafulltrúa – vísar orðum þess fyrrnefnda algerlega til föðurhúsanna. Sagði að ef P.Í. áttaði sig ekki á tillögu kirkjustjórnarinnar um embættis- og aksturskostnað og teldi þetta ekki vera kjaramál þá vissi hann bara ekki á hvaða fundi hann væri staddur. – Tillögur um nýtt fyrirkomulag á rekstrarkostnaði prestsembætta og vegna prófastsstarfa sem og starfsreglur um embættiskostnað, verða kynntar á prestastefnu. Hefur undirbúið sig fyrir það og veit um afstöðu prófasta í stærstu prófastdæmunum sem eru hvað harðastir í andstöðu sinni og finna sig sem litla biskupa. – Gat þess í lokin að hann hefði barist fyrir eignarréttarstöðu kirkjunnar í tuttugu ár og sagðist geta rætt það í klukkutíma en vildi hlífa fundarmönnum við því.

Sr. Magnús B. Björnsson

Tekur undir orð vegna mála sr. Carlosar A. Ferrers. Segir stórmál vera framundan og vegið sé að embættinu. Sorglegt að sjá hvernig lögin hafa verið túlkuð og hvernig málum hefur undið fram. Til andmælaréttar prests kom ekki fyrr en frammi fyrir ráðherra. Þetta þarf að laga. – Tekur undir það að prestur eigi að sitja í stjórn Prestssetrasjóðs. Mikilvægt að fundurinn sé einhuga um það. – Þakkar stjórn P.Í. fyrir vel unnin störf. – Ein spurning ofarlega í huga: Hvernig getum við styrkt stjórn P.Í. svo það verði enn öflugra stéttarfélaga? Telur að fara þurfi ofan í saumana á málum stéttarinnar, setja skýr markmið svo félagið verði enn öflugra stéttarfélag.

Sr. Ólafur Jóhannsson

Þakkar líflega umræðu sem sýnir að prestar koma vel undan vetri. Aðalfundurinn er enda vettvangur til að takast á um mál. Þakkar það veganesti sem stjórnin hefur fengið á fundinum. Nefnir að stjórnin hafi ekki enn fengið tækifæri til að ganga á fund kjararáðs. – Fór nokkrum orðum um embættis- og aksturskostnaðarmálin sem kynnt verða á prestastefnu og sömuleiðis tillaga að starfsreglum um breyting á starfsreglum um sóknarnefndir nr. 732/1998, starfsreglum um presta nr. 735/1998 og starfsreglum um úrskurðarnefnd og áfrýjunarnefnd þjóðkirkjunnar nr. 730/1998. Fór nokkrum orðum um mál sóknarprestsins í Tjarnarprestakalli og stuðning P.Í. við hann. Mál hans er nú hjá umboðsmanni Alþingis. Ekki má víkjast undan því að styðja sr. Carlos í máli þessu. – Hvað athugasemdir um tímalengd aðalfundar minnti hann á að skýrsla formanns hefði verið send út til félagsmanna í því skyni að þeir gætu kynnt sér efni hennar áður en til fundar kæmi. Fundartími væri nú reyndar ívið lengri en í fyrra en seinkun á flugi til Húsavíkur hefði líka haft sín áhrif. Taldi formaður ekki unnt að hafa lengri tíma fyrir fundinn innan þessa ramma sem preststefnan væri. Þakkaði fyrir góða og gagnlega umræðu á fundinum.

Þá bar sr. Þorgrímur Daníelsson, fundarstjóri, upp skýrslu stjórnar og var hún samþykkt. Reikningar félagsins voru líka samþykktir sem og fjárhagsáætlun.

Við fundarstjórn tók sr. Jón Helgi Þórarinsson.

Skýrslur siðanefndar, námsleyfanefndar, Kirkjuritsins og Vísindasjóðs

Lágu skýrslur þessar fyrir á fundinum.

Skýrsla um störf siðanefndar

Eitt mál barst nefndinni og voru haldnir fimm fundir. Málið var til lykta leitt. Formaður siðarnefnar er sr. Birgir Ásgeirsson en með honum í henni sitja þær sr. Agnes Sigurðardóttir og Salvör Nordal.

Fundarstjóri gaf orðið laust um skýrslu siðanefndar. Enginn kvaddi sér hljóðs.

Skýrsla um störf námsleyfanefndar presta

Nefndin hélt einn formlegan fund á síðasta starfsári. Sjö prestar fá námsleyfi 2007-2008.

Formaður námsleyfanefndar er sr. Þorvaldur Karl Helgason en með honum í henni eru þeir sr. Guðmundur Karl Ágústsson og Hjalti Zóphóníasson, lögfræðingur.

Fundarstjóri gaf orðið laust um skýrslu námsleyfanefndar. Enginn kvaddi sér hljóðs.

Skýrsla um starfsemi Kirkjuritsins

Tvö rit hafa komið út frá síðustu prestastefnu. Í burðarliðnum er tölublað sem helgað verður sr. Sigurbirni Einarssyni, biskupi. Farið verður í áskriftarherferð fyrir útkomu fyrsta tölublaðs þessa árs. Áskrifendur eru um 900 talsins.

Ritstjóri Kirkjuritsins er sr. Eiríkur Jóhannsson. Ritnefnd skipa: Sr. Arna Ýrr Sigurðardóttir, sr. Hreinn S. Hákonarson, sr. Kristín Þórunn Tómasdóttir, sr. Óskar Hafsteinn Óskarsson og sr. Vigfús Ingvar Ingvarsson.

Sr. Magnús Magnússon, gjaldkeri P.Í., gerði grein fyrir reikningum Kirkjuritsins,

undirrituðum af skoðunarmönnum, þeim sr. Írisi Kristjánsdóttur og sr. Pétri Þorsteinssyni. Hagnaður af rekstri er kr. 110.137. Rekstrarstjóri er frú Edda Möller. Reikningar Kirkjuritsins voru samþykktir samhljóða.

Fundarstjóri gaf orðið laust um skýrslu Kirkjuritsins. Enginn kvaddi sér hljóðs.

Skýrsla um störf Vísindasjóðs P.Í.

Stjórn Vísindasjóðsins hélt 6 fundi á starfsárinu. Afgreiddar voru 382 umsóknir og voru allar samþykktar nema ein. Þá voru styrkt þrjú námskeið fyrir presta – en alls voru úthlutanir til 137 presta að upphæð kr. 6.685.621. Höfuðstóll um síðustu áramót var kr. 27. 848.297

Formaður Vísindasjóðs P.Í. er dr. dr. Sigurjón Árni Eyjólfsson og með honum í stjórninni sitja sr. Gísli Jónasson og sr. Hildur Sigurðardóttir.

Fundarstjóri gaf orðið laust um skýrslu Vísindasjóðsins. Enginn kvaddi sér hljóðs.

Kosningar

Þá var gengið til kosninga. Úr stjórn eiga að ganga þeir sr. Hreinn S. Hákonarson og sr. Kristinn Jens Sigurþórsson. Gefa þeir ekki kost á sér til endurkjörs. Fundarstjóri leitaði eftir tilnefningum og var stungið upp á þeim sr. Ingileifu Malmberg, sr. Magnúsi B. Björnssyni, sr. Sigríði Mundu Jónsdóttur og sr. Þóri Jökli Þorsteinssyni.

Atkvæði féllu sem hér segir:

Sr. Ingileif Malmberg 53

Sr. Magnús B. Björnsson 29

Sr. Sigríður Munda Jónsdóttir 28

Sr. Þórir Jökull Þorsteinsson 16

Skoðast þau sr. Ingileif og sr. Magnús rétt kjörin til tveggja ára í stjórn P.Í.

Næst kom að kjöri tveggja varamanna til eins árs. Varamenn eru nú sr. Þorvaldur Víðisson og sr. Elínborg Sturludóttir. Þau gefa kost á sér áfram. Ekki komu uppástungur um aðra til varamennsku og voru þau kjörin með lófataki.

Stjórn P.Í. er þá svo skipuð:

Sr. Ólafur Jóhannsson, formaður

Sr. Sigrún Óskarsdóttir

Sr. Magnús Magnússon

Sr. Ingileif Malmberg

Sr. Magnús B. Björnsson

Varamenn:

Sr. Elínborg Sturludóttir

Sr. Þorvaldur Víðisson

Tveir skoðunarmenn eru kosnir á hverju ári. Þeir eru nú: sr. Pétur Þorsteinsson og sr. Íris Kristjánsdóttir. Bæði gefa kost á sér áfram. Fundarstjóri leitað eftir tilnefningum en engar komu fram. Þau sr. Pétur og sr. Íris kjörin með lófataki.

Kjósa þarf varamann skoðunarmanna reikninga til eins árs. Óljóst er hver gegnir því nú. Stungið var upp á sr. Erni Bárði Jónssyni og var hann kjörinn með lófataki.

Kjósa þarf þrjá í stjórn Vísindasjóðs P.Í. Núverandi stjórn gefur kost á sér en hún er svo skipuð: Dr. dr. Sigurjón Árni Eyjólfsson, sr. Gísli Jónasson og sr. Hildur Sigurðardóttir. Fundarstjóri leitaði eftir tilnefningum en engar bárust. Voru þau því kjörin með lófataki. Skoðunarmaður reikninga Vísindasjóðsins var einnig kjörin með lófataki, sr. Íris Kristjánsdóttir.

Þegar kosningum var lokið var gefið kaffihlé. Sr. Kristján Valur Ingólfsson kvaddi sér hljóðs og greindi frá því að prósessía presta héldi frá hótelinu og að kirkju.

Eftir kaffihlé var dagskrá fram haldið.

Siðareglur presta frá 1997 með tillögum að breytingum

Sr. Irma Sjöfn Óskarsdóttir tók til máls. Kvað hún í sjálfu sér óþarft að fara ítarlega yfir tillögur að breytingum á siðareglum presta þar sem þær hefðu verið kynntar á aðalfundi P.Í. í fyrra. Auk þess hefðu þær verið sendar félagsmönnum í pósti fyrir aðalfund. Fór almennum orðum um störf nefndarinnar og gat um að leitast hefði verið við að taka tillit til breytts umhverfis samtímans við endurskoðun reglnanna. Nefndi t.d. þá tillögu þar sem lagt væri til að orðið algerri félli niður í sambandi við þagnarskyldu presta. Rifjaði upp að nokkur umræða hefði orðið um það í fyrra sem og þá grein reglnanna þar sem vikið væri að Barnaverndarlögum. Sums staðar eru lagðar til orðalagsbreytingar og eru sumar hverjar málfarslegar. Þá eru tillögur um að siðareglurnar verði styttar með tilliti til þess að ýmis lög og margvíslegar reglur í samfélaginu eru rétthærri en þau ákvæði sem lagt er til að falli út.

Síðan var afgreiðsla málsins hafin og fór þannig fram að hver grein með tillögum að breytingum var borin upp. Skáletraður texti í greinunum eru tillögur að breytingum en það sem lagt er til að falli brott er yfirstrikað. Þá voru greinar siðareglnanna bornar upp og fyrst gr. 1.1. með breytingatillögum nefndarinnar:

1.1 Þetta eru (S)siðareglur þessar eru ætlaðar presta presta, sem vígðir hafa verið til hins heilaga prests- og prédikunarembættis innan þjóðkirkju Íslands, guðfræðinga og presta annarra kristinna trúfélaga sem eru meðlimir í Prestafélagi Íslands. Siðareglur þessar Þær eru ætlaðar þeim til stuðnings og leiðbeiningar í þjónustu við Guð og menn.

Tillagan samþykkt.

Greinin er því svo eftir afgreiðsluna:

Nefndin sem yfirfór siðareglur P.Í. lagði til að grein 1.2 yrði óbreytt en hún hljóðar svo:

1.2 Siðareglurnar eiga að efla sjálfsvirðingu og starfsmetnað stéttarinnar og stuðla að auknu samstarfi og samkennd hennar.

Sr. Þórir Jökull Þorsteinsson lagði til að þessi grein félli öll út en það var fellt. Dr. Sigurður Árni Þórðarson lagði til að sjálfsvirðingu og félli út og var það samþykkt.

Greinin er því svo eftir afgreiðsluna:

1.2 Siðareglurnar eiga að efla starfsmetnað stéttarinnar og stuðla að auknu samstarfi og samkennd hennar.

Næst var tekinn fyrir 2. kafli siðareglnanna sem fjallar um köllun og geymir ákvæði um frumskyldur þjónustunnar:

Prestur er þjónn og hirðir safnaðarins, en er ekki starfsmaður hans. Prestur leiðir helgihald safnaðarins á helgum og hátíðum, boðar orð Guðs opinberlega í prédikun guðsþjónustunnar og annarra helgra athafna og í einrúmi sálgæslu og skrifta. Prestur úthlutar sakramentum skírnar og kvöldmáltíðar, uppfræðir börn í meginatriðum kristinnar trúar og siðgæðis, fermir, gefur saman hjón, veitir sálgæslu og ráðgjöf, hlýðir skriftum, jarðsyngur látna, styður syrgjendur til að finna huggun trúar, vonar og kærleika í samfélaginu við frelsarann, Jesú Krist.
Prestur er kallaður til að laða fólk til trúar og leiða söfnuðinn að lindum orðs og sakramenta og styrkja með guðsþjónustu, fræðslu og kærleiksþjónustu vitnisburð kirkjunnar um náð Guðs og návist. fulltrúaráðsfundur vildi sleppa þessum kafla og almennt var talað um að reglurnar væru of langar og allt of margorðar.

Tillögur nefndarinnar að breytingum á grein 2.1 voru allar samþykktar nema hvað haldið var inni upphafssetningu 3. málsgreinar samkvæmt tillögu sr. Geirs G. Waage en hún hljóðar svo: Prestur er þjónn og hirðir safnaðarins, en er ekki starfsmaður hans.

Greinin er því svo eftir afgreiðsluna:

Prestur er þjónn og hirðir safnaðarins, en er ekki starfsmaður hans.

Ekki eru gerðar tillögur um breytingar á greinum 2.2 og 2.3 sem hljóða svo:

Gerðar eru tvær tillögur um breytingar á grein 2.4:

2.4 Sálgæsla byggist á virðingu og trúnaðartrausti og er því sérstaklega viðkvæm og vandmeðfarin. Prestur má ekki undir neinum kringumstæðum misnota aðstöðu sína sem sálusorgari eða ógna velferð skjólstæðings, t.d. s.s. með kynferðislegri áreitni, né vanvirða tilfinningar hans og tiltrú með öðrum hætti.

Sr. Geir G. Waage spurði hvað fælist í tillögu nefndarinnar í lokaorðum greinarinnar þar sem stendur: ...með öðrum hætti, og útskýrði sr. Irma Sjöfn hvað nefndin hefði haft í huga. Breytingarnar samþykktar.

Greinin er því svo eftir afgreiðsluna:

Grein 2. 5 er óbreytt:

2.5 Prestur notfærir sér ekki vitneskju eða tengsl sem hann öðlast við störf sín í ábata- eða hagsmunaskyni.

Nefndin leggur til að grein 2.6 verði svo:

2.6 Prestur fer ekki í manngreinarálit og veitir fólki sálgæslu og aðra kirkjulega þjónustu eftir því sem við á. án tillits til kynferðis, stöðu, skoðana, trúar, þjóðernis, kynþáttar eða vegna annarrar sérstöðu.

Fram kom tillaga um að halda inni hinum yfirstrikaða texta en hún var ekki samþykkt. Þær raddir komu fram að upptalningin sem þar kemur fram væri óþörf og varhugaverð. Tillaga nefndarinnar var hins vegar samþykkt.

Greinin er því svo eftir afgreiðsluna:

2.6 Prestur fer ekki í manngreinarálit og veitir fólki sálgæslu og kirkjulega þjónustu eftir því sem við á.

Greinar 2.7 og 2.8 eru óbreyttar:

2.7 Prestur innir ekki af hendi prestsþjónustu við athafnir sem ekki samrýmast helgisiðum eða boðun þjóðkirkjunnar eða sem hann treystir sér ekki til að sinna samvisku sinnar vegna.

2.8 Prestur sýnir jafnan trú og siðum annarra umburðarlyndi og forstöðumönnum og prestum annarra trúfélaga og kirkjudeilda virðingu.

Tillögur nefndarinnar við breytingu á grein 2.9 voru samþykktar:

2.9 Prestur ber sjálfstæða ábyrgð á að rækja embætti sitt eftir gildandi lögum og kirkjusiðum. Hann er fulltrúi kirkju sinnar og stéttar. Hann gætir þess því vandlega í starfi og einkalífi að hafa virðingu kirkjunnar og sóma stéttarinnar í heiðri.

Greinin er því svo eftir afgreiðsluna:

Nefndin leggur til að greinar 2.10, 2.11 og 2.12 falli út. Var það samþykkt.

2.10 Prestur leitast við að undirbúa og rækja skyldustörf sín af alúð og trúmennsku. Hann lætur uppbyggjast með því að taka frá nauðsynlegan tíma til íhugunar, bænar og náms og annars undirbúnings. Prestur leitast við að auka þekkingu sína og hæfni í starfi, rannsaka ritningarnar af kostgæfni og viðhalda guðfræðimenntun sinni eftir megni

2.11 Prestur leitast við að gera sér grein fyrir styrkleika sínum og takmörkunum. Fari vinnuálag fram úr því sem eðlilegt getur talist skal hann þegar í stað leita aðstoðar prófasts um breytt skipulag og starfsskilyrði.Prestur reynir eftir föngum að leita sér reglubundinnar handleiðslu og leiðsagnar til að vinna gegn einangrun og því að örmagnast.

2.12.Prestur reynir eftir föngum að leita sér reglubundinnar handleiðslu og leiðsagnar til að vinna gegn einangrun og því að örmagnast.

Vegna brottfalls fyrrgreindra greina breyast númer á siðareglum og sú breyting borin undir fundarmenn sem þeir samþykktu. Grein 2.13 verður því grein 2.10.

2.13 2.10 Prestur innir jafnan embættisþjónustu sína af hendi í samræmi við gildandi helgisiði og hefðir þjóðkirkjunnar og leitar leyfis biskups til frávika frá þeim.

Greinin er því svo eftir breytinguna:

2.10 Prestur innir jafnan embættisþjónustu sína af hendi í samræmi við gildandi helgisiði og hefðir þjóðkirkjunnar og leitar leyfis biskups til frávika frá þeim.

Nefndin leggur til að grein 2.14 falli út. Var það samþykkt.

2.14 Prestur vandar ávallt alla kirkjubókafærslu, skýrslugerð og vottorð.

Grein 2.15 verður 2.11 og var númerabreytingin samþykkt.

2.15 2:11 Prestur sinnir af kostgæfni öðrum þeim verkefnum sem gildandi lög eða reglur kveða á um eða sem biskup felur honum á hendur, enda rúmist þau innan embættisþóknunar.

Greinin er því svo eftir breytinguna:

2.11 Prestur sinnir af kostgæfni öðrum þeim verkefnum sem gildandi lög eða reglur kveða á um eða sem biskup felur honum á hendur, enda rúmist þau innan embættisþóknunar.

Næst voru bornar upp breytingar á grein 2.16 og voru þær samþykktar, niðurfelling á orðinu nein, og númerabreyting.

2.16 2.12 Prestur tekur ekki að sér nein þau aukastörf sem skert geta sjálfstæði hans og frelsi til þeirrar helgu þjónustu sem vígslubréf og vígsluheit leggja honum á herðar.

Greinin er því svo eftir breytinguna:

2.12 Prestur tekur ekki að sér aukastörf sem skert geta sjálfstæði hans og frelsi til þeirrar helgu þjónustu sem vígslubréf og vígsluheit leggja honum á herðar.

Þá var komið að 3. kafla siðareglnanna: Saman að einu marki – Ákvæði um skyldur gagnvart starfssystkinum. Nefndin leggur m.a. til að greinar 3.1 og 3.2 verði að einni grein.

3.1 Prestar virða starfsvettvang hver annars og stuðla að góðu samstarfi og samkennd fremur en samkeppni innan stéttarinnar. 3.2 Prestar Þeir sýna hver öðrum heilindi og virðingu í viðtali sem umtali, ráðum og gjörðum og forðast að gefa í skyn yfirburði sína yfir starfssystkin sín.

Tillögur nefndarinnar samþykktar.

Greinin er því svo eftir breytinguna:

Síðan var grein 3.3 (3.2) tekin fyrir. Nefndin gerir eftirfarandi breytingatillögur:

3.2 Þar sem fleiri en einn prestur starfa saman í prestakalli skulu þeir skipta með sér verkum í samráði við prófast. og skal sóknarprestur sjá til þess að verkaskipting sé virt. Verði ágreiningur milli presta skal leggja málið fyrir prófast.og ef þörf krefur vísa því til biskups. til úrskurðar. Náist ekki úrlausn er síðan hægt að leita til úrskurðarnefndar til að skera úr um málið.

Nokkrar umræður urðu um grein þessa. Sr. Geir G. Waage og sr. Sigríður Guðmarsdóttir töldu að orðin: „...og skal sóknarprestur sjá til þess að verkaskipting sé virt,“ ættu að haldast inni þar sem óþarfi væri að taka þennan vanda af sóknarprestinum að vera sóknarprestur og að í þessu fælist ábyrgð. Sr. Irma Sjöfn Óskarsdóttir vísaði til rökstuðnings nefndarinnar þar sem stæði að þetta væri í verkahring prófasts. Spurt var hver ætti að sjá um þetta frá degi til dags. Sr. Jakob Ágúst Hjálmarsson taldi að þetta ákvæði ætti heima í starfsreglum en ekki siðareglum.

Fundarstjóri bar fyrst upp breytingartillögu nefndarinnar þar sem hún leggur til að í fyrstu setningu komi orðið saman og út falli: í prestakalli. Þetta var samþykkt.

Því næst bar hann upp breytingartillögu nefnarinnar: . og skal sóknarprestur sjá til þess að verkaskipting sé virt. Atkvæði féllu svo að 15 vildu halda orðunum inni en 16 að þau féllu brott. Tillaga nefndarinnar því samþykkt.

Þá var vikið að breytingatillögum við seinni hluta greinarinnar: og ef þörf krefur vísa því til biskups. til úrskurðar. Náist ekki úrlausn er síðan hægt að leita til úrskurðarnefndar til að skera úr um málið.

Sr. Halldór Gunnarsson gerði það að tillögu sinni að síðasta setningin félli út, þ.e. viðbótin sem nefndin leggur til: Náist ekki úrlausn... o.s.frv. Tillaga sr. Halldórs samþykkt. Tillaga nefndarinnar um brottfall: ...og ef þörf krefur o.s.frv. felld. Númerabreyting greinarinnar einnig samþykkt.

Greinin hljóðar því svo eftir afgreiðsluna:

Næst var tekin fyrir grein 3.4:

3.4 Prestar vinna embættisverk fyrir starfssystkin sín án endurgjalds án þess að krefja þau um greiðslu fyrir.

Tillaga kom upp um að sleppa fyrir í lok greinarinnar og var það samþykkt. Tillögur nefndarinnar voru samþykktar sem og númerabreyting, hún verður 3.3.

Greinin hljóðar því svo eftir afgreiðsluna:

3.3 Prestar vinna embættisverk fyrir starfssystkin sín án þess að krefja þau um greiðslu.

Þessu næst grein 3.5:

3.5 Þegar prestur sækir um embætti eða starf sýnir hann öðrum umsækjendum fyllstu tillitssemi og samstöðu Þegar prestur lætur af embætti hlutast hann ekki til um hver er valin/n í hans stað.

Sr. Cecil Haraldsson gerði það að tillögu sinni að í stað er valin/n í hans stað kæmi umsækjenda er valinn í hans stað. Breytingartillaga hans við breytingartillögu nefndarinnar samþykkt. Tillaga nefndarinnar að öðru leyti samþykkt. Númerabreyting samþykkt.

Greinin hljóðar því svo eftir afgreiðsluna:

3.4 Þegar prestur sækir um embætti eða starf sýnir hann öðrum umsækjendum fyllstu tillitssemi og samstöðu. Þegar prestur lætur af embætti hlutast hann ekki til um hver umsækjenda er valinn í hans stað.

Grein 3.6 var næst tekin til umfjöllunar. Frá nefndinni kemur hún svo:

3.6 Prestur gætir þess að eiga gott samstarf við samstarfsfólk sitt, yfirmenn, sóknarnefndir og trúnaðarmenn tilsjónarmenn og leitast við að stuðla að eindrægni og samhug. Prestur sýnir yfirboðurum sínum trúnað og hollustu í hvívetna.

Sr. Geir G. Waage lagði til að orðinu yfirmenn yrði sleppt. Það samþykkt sem og tillögur nefndarinnar að öðru leyti. Númerabreyting samþykkt.

Greinin hljóðar því svo eftir afgreiðsluna:

3.5 Prestur gætir þess að eiga gott samstarf við samstarfsfólk sitt, sóknarnefndir og tilsjónarmenn og leitast við að stuðla að eindrægni og samhug.

Grein 3. 7 er óbreytt nema hvað eðli máls samkvæmt verður hún 3.6 og var tillaga um það samþykkt.

3.7 Prestur gætir þess að vera málefnalegur og gætir varkárni í ummælum um kenningarleg og guðfræðileg mál, hvort sem er í samræðum eða opinberlega.

Greinin hljóðar því svo eftir afgreiðsluna:

3.6 Prestur gætir þess að vera málefnalegur og gætir varkárni í ummælum um kenningarleg og guðfræðileg mál, hvort sem er í samræðum eða opinberlega.

Þá var komið að 4. kafla siðareglnanna sem fjallar um trúnað og geymir ákvæði um þagnarskylduna. Nefndin gerir eftirfarandi tillögur að breytingum á grein 4.1:

4.1 Prestur er bundinn algjörri þagnarskyldu um allt er hann verður áskynja í starfi og leynt skal fara. Í sálgæslu og skriftum er prestur áheyrandi í Krists stað. Þess sem hann verður þannig áskynja má hann því aldrei láta uppi án samþykkis viðkomandi skjólstæðings. Presti ber að fylgja samvisku sinni og sannfæringu. Þagnarskyldan leysir prest þó aldrei undan ákvæðum Barnaverndarlaga um tilkynningaskyldu.

All nokkrar umræður urðu um breytingartillögu nefndarinnar á þessari grein. Ræddu menn einkum það er lýtur að þagnarskyldunni, fella út algjörri, og þau orð að sú skylda leysti prest aldrei undan ákvæðum Barnaverndarlaga um tilkynningaskyldu.

Sr. Sigríður Guðmarsdóttir spurði hvort ákvæðið þar sem Barnaverndarlaga væri getið ætti heima í siðareglum P.Í. Þyrfti að taka það fram að prestar væru ekki undanþegnir lögum? Setning þessi ætti ekki heima í siðareglum.

Sr. Geir G. Waage lagði áherslu á að um algjöran trúnað væri að ræða. Presturinn segði engum frá neinu og skipti engu máli um hvað væri að tefla. Hverjum ætti að vera hægt að treysta ef frjálst væri að halda þagnarskyldu? Prestafélag sem er frjálst félag innan þjóðkirkjunnar getur ekki lýst því yfir ótilneytt og bundið félagsmenn sína við þá stefnumörkun að fremur beri að hlýða mönnum en Guði. Sagðist vel geta lifað við að slíkt stæði í lögum en skyldur hans sem prests gengju lengra en mannanna boð. Gæti vart verið félagi í P.Í. ef þessu yrði breytt.

Sr. Úlfar Guðmundsson ræddi þagnarskylduna og sagðist vera mikill þagnarskyldumaður. Hvað Barnaverndarlögin snerti sagðist hann líta svo á að það væri hlutverk P.Í. að hafa áhrif á að þeim væri breytt svo prestar yrðu leystir undan því að tala. Taldi að með því að presti væri leyft að þegja þá væri í raun verið að fjölga meðferðarúrræðum. Þagnarskylda væri visst aukameðferðarúrræði. Samtöl í trúnaði gætu haft þau áhrif að hægt væri að bregðast við eftir ýmsum leiðum en eftir stæði trúnaðarsamtalið óskert.

Sr. Bjarni Karlsson sagði að kirkjan mætti aldrei vera sá staður þar sem setið væri inni með upplýsingar sem varða líf og heill einstaklinga sem ekki gætu varið sig. Taldi mikilvægt að fagfólk í landinu vissi að ef leitað væri til prests þá væri staðið þétt við bakið á þeim sem brotið væri á. Hlýða verður Barnaverndarlögum og kirkjan má ekki verða skálkaskjól fyrir óheilbrigði.

Sr. Cecil Haraldsson íhugaði hversu framkvæmanleg þagnarskyldan væri. Hún væri ekki aðeins skylda heldur og líka réttur sem prestar væru vígðir undir. Hún væri á vissan hátt vernd prestsins sem sálusorgara.

Sr. Kristinn Jens Sigurþórsson hvatti til þess að þagnarskyldin yrði í heiðri höfð. Stundum stæðu menn frammi fyrir því sem óbærilegt væri – og gætu ekki annað.

Sr. Irma Sjöfn Óskarsdóttir ítrekaði að taka þyrfti fullt tillit til Barnaverndarlaga enda þótt oftast yrði að þegja – og þá helst alltaf.

Sr. Gunnar Rúnar Matthíasson ítrekaði að aðeins væri vísað til Barnaverndarlaga. Ekki hægt að múlbinda þagnarskylduna. Styður eindregið að orðið algjörri verði fellt út. Lítur svo á að breytingin veiki í engu umræðuna um þagnarskylduna.

Sr. Bára Friðriksdóttir ræðir um Barnaverndarlögin frá 2002. Vann í eitt ár við mál sem tengjast m.a. barnavernd og sá að börnin eru iðulega fórnarlömb aðstæðna sinna og undir hina fullorðnu sett. Þögnin er þeirra mesti óvinur og hún meiði oft mest.

Sr. Anna Pálsdóttir segist hafa hugsað mikið um þetta mál og sitthvað togast á í huga hennar. Börnin eigi um sárt að binda vegna alvarleika margra mála sem upp koma. Sannfærð um það að til þess að mál sé rætt þá verði að ríkja trúnaður - ef ekki þá verður ekki samtal. Situr ekki þegjandi ef einhver stórkostleg alvörumál eru reifuð í hennar áheyrn.

Sr. Þórir Jökull Þorsteinsson leggur áherslu á að þagnarskyldan sé algjör. Prestar séu fulltrúar heilagrar kirkju og framar beri að hlýða Guði en mönnum. Tilvera kirkjunnar helgast af því að allir eru pervers af syndinni og ýmislegs er að vænta af þeim. Menn umgangist embætti sín í samræmi við þagnarskyldu. Og næsta víst sé að menn finni leið sem bjargar þeim er líða.

Sr. Halldór Gunnarsson tekur undir orð síðustu ræðumanna. Alvörumál ef menn hyggjast segja skilið við P.Í. verði þessu breytt. Leggur áherslu á alvöru mála af þessum toga sem barnaverndarlög ná til. Treystir prestum vel til að vinna mál þess sem talar við þá og leiða það til lykta.

Sr. Vigfús Ingvarsson segist ekki tala af mikilli reynslu af hinum viðkvæmustu málum. Trúnaður er forsenda þess að prestur komi að máli. Ekki trúnaðarskylda sem hefur stöðvað mál í réttlætisátt. Þagnarskyldan leysir menn ekki undan því að réttlæti nái fram að ganga og sér í lagi gagnvart þeim sem höllum fæti standa eins og til dæmis börnum. Strika út algjörri – þagnarskylda ein og sér sterk. Óeðlilegt að mati hans að binda það í siðareglur að það beri að fara að landslögum.

Sr. Geir Waage lagði til að orðið algjörri stæði áfram í grein 4.1 og var sú tillaga borin upp til atkvæða og hún felld.

Þá var borin upp tillaga um að síðasta setningin í grein 4.1 (þar sem getið er um Barnaverndarlögin) sem nefndin leggur til að bætt verði inn, falli út. Var tillaga nefndarinnar felld. Tillaga nefndarinnar að öðru leyti samþykkt.

Greinin hljóðar því svo eftir afgreiðsluna:

Grein 4.2 var næst tekin fyrir. Nefndin gerir eftirfarandi breytingatillögur:

4.2 Ef prestur fær ráðgjöf varðandi skjólstæðing ber honum að virða þagnarskylduna þannig að persónulegar upplýsingar komi ekki fram nema óhjákvæmilegt sé. Þegar prestur leitar sér faglegrar ráðgjafar eða handleiðslu varðandi mál sem hann hefur eða hefur haft með höndum, gætir hann þess að ákvæði þagnarskyldu séu virt.

Breytingatillögur nefndarinnar voru samþykktar.

Greinin hljóðar því svo eftir afgreiðsluna:

4.2 Þegar prestur leitar sér faglegrar ráðgjafar eða handleiðslu varðandi mál sem hann hefur eða hefur haft með höndum, gætir hann þess að ákvæði þagnarskyldu séu virt.

Þá grein 4.3. Nefndin gerir þessa breytingartillögu:

4.3 Prestur má aldrei nota samtöl við skjóstæðing sem dæmi í ræðu eða riti. Noti prestur dæmi úr starfi í ræðu eða riti skal hann sjá til þess að þau séu órekjanleg.

Greinin samþykkt með breytingum.

Greinin hljóðar því svo eftir afgreiðsluna:

4.3 Noti prestur dæmi úr starfi í ræðu eða riti skal hann sjá til þess að þau séu órekjanleg.

Grein 4. 4 er óbreytt: Starfslok leysa prest ekki undan þagnarskyldunni.

Að síðustu var borin upp tillaga nefndarinnar um að allur fimmti kafli siðareglnanna félli út og var það samþykkt en hann hljóðaði svo:

5. Til vitnisburðar

Ákvæði um félagslegar skyldur

5.1 Prestur vill vera trúr köllun sinni þannig að guðfræðimenntun hans og helgun verði kirkju og þjóð til heilla og Guði til dýrðar.

5.2 Prestur vill leggja sig fram um að stuðla að heill samfélagsins. Hann stendur með öllum þeim sem vinna að heilbrigði manns og heims, réttlæti, mannúð og friði.

5.3 Prestur vill bera vitni um kristna von og kærleika með því að láta sér annt um fólk, virða þarfir þess til lífs og sáluhjálpar og leitast við að vernda mannslífið á ólíkum skeiðum þess.

5.4 Prestur umgengst sköpun Guðs af ábyrgð, trúmennsku og lotningu. Öll náttúran í margbreytileika sínum er viðfangsefni þess erindis og þjónustu sem prestinum er trúað fyrir.

5.5 Prestur leitast við í starfi, boðun og lífsmáta að vekja skilning og umburðarlyndi meðal manna, menningarhópa og þjóða. Hann vill stuðla að sátt og samhjálp milli þjóða og leggja sitt af mörkum til hjálpar þeim sem líða vegna skorts á lífsbjörg og aðhlynningu.

Fundarstjóri bar síðan upp breyttar siðareglur í heild sinni og voru þær samþykktar.

Nýsamþykktar siðareglur presta eru í heild sinni aftast í fundargerð þessari.

Næsta mál á dagsrká:

8. Reglur um Siðanefnd Prestafélags Íslands og breytingatillögur nefndarinnar um hana

Skáletraður texti í greinunum eru tillögur að breytingum en það sem lagt er til að falli brott er yfirstrikað.

Fyrsta grein reglnanna er óbreytt:

Nefndin gerir eftirfarandi breytingartillögu við 2. gr:

2. Hver sá sem telur að prestur hafi brotið framangreindar siðareglur getur kært til siðanefndar. Siðanefnd tekur aðeins fyrir mál sem henni berast skriflega. Jafnframt skal siðanefnd afgreiða öll mál skriflega. Siðanefnd er heimilt að vísa máli frá með sjái hún ástæðu til.

Fram kom breytingartillaga við breytingartillögu frá sr. Guðrúnu Eggertsdóttur um að skjóta inn orðunum: með rökstuðningi: Siðanefnd er heimilt að vísa máli frá með rökstuðningi sjái hún ástæðu til.

Var það samþykkt og tillaga nefndarinnar að öðru leyti.

Greinin hljóðar því svo eftir afgreiðsluna:

Engar tillögur um breytingar á greinum 3-5:

3. Siðanefnd gætir þess að fyllsta trúnaðar og nafnleyndar sé gætt varðandi öll málsgögn og samtöl vegna meðferðar mála.

Við sjöttu grein reglna um siðanefnd leggur nefndin til þessar breytingar:

6. Hafi sá er kærður er verið félagsmaður P.Í. þegar meint brot er talið hafa verið framið, þá skal siðanefnd P.Í. fjalla um málið. Ef kæra reynist á rökum reist skal siðanefnd kveða skýrt á um hvort brotið var ámælisvert, alvarlegt eða mjög alvarlegt. Ef brot er ámælisvert skal siðanefnd veita viðkomandi presti áminningu. Ef brotið er alvarlegt eða mjög alvarlegt vísar siðanefnd málinu til stjórnar P.Í. ásamt áliti sínu. Stjórn félagsins tekur ákvörðun um hvort vísa skuli viðkomandi úr félaginu. Í öllum tilvikum skulu málsaðilum, stjórn P.Í. og biskupi Íslands kynntar álitsgerðir niðurstöður siðanefndar.

Sr. Geir G. Waage taldi það vera sjálfsagt mál að viðkomandi vígslubiskupi yrðu kynntar álitsgerðir siðanefndar. Lagði til að síðasta setningin yrði svo: Í öllum tilvikum skulu málsaðilum, stjórn P.Í. , biskupi Íslands og vígslubiskupum o.s.frv. Var það samþykkt. Tillögur nefndarinnar að öðru leyti samþykktar.

Greinin hljóðar því svo eftir afgreiðsluna:

Sjöunda grein tekin fyrir. Nefndin gerir eftirfarandi breytingartillögur:

7. Birta skal álitsgerðir siðanefndar í kirkjuritinu og þegar eftir þeim er leitað nema siðanefnd kjósi ekki opinbera birtingu Stjórn P.Í. er heimilt í samráði við siðanefnd að birta niðurstöður eða álitsgerðir siðanefndar eftir því sem þurfa þykir

Sr. Cecil Haraldsson leggur fram breytingartillögu við breytingartillögu nefndarinnar:

Stjórn P.Í. er heimilt að fengnu samþykki siðanefndar (út fellur:í samráði við siðanefnd) að birta niðurstöður eða álitsgerðir siðanefndar eftir því sem þurfa þykir.

Sr. Cecil sagði að breytingartillaga nefndarinnar væri grundvallarbreyting því nú kæmi P.Í. beint að málinu. Álitsgerðir siðanefndar hefðu ekki verið allar birtar – það hefði verið í höndum siðanefndar.

Sr. Úlfar Guðmundsson kvaddi sér hljóðs og greindi frá því að álitsgerðir hefðu verið birtar. Það væri hins vegar viss vandi hvort birta ætti þær og ef, þá hvenær. Stundum væri til dæmis rétt að birta álitsgerð strax.

Breytingartillaga sr. Cecils samþykkt og tillögur nefndarinnar að öðru leyti.

Greinin hljóðar því svo eftir afgreiðsluna:

7. Stjórn P.Í. er heimilt að fengnu samþykki siðanefndar að birta niðurstöður eða álitsgerðir siðanefndar eftir því sem þurfa þykir.

Síðasta grein siðareglnanna er óbreytt:

8. Siðanefnd skal vera vakandi fyrir þeim ágöllum sem vera kunna á siðareglum þessum og leggja fyrir stjórn P.Í. tillögur um breytingar á þeim ef þurfa þykir.

Að lokum voru siðareglur P.Í. bornar upp með áorðnum breytingum og þær samþykktar.

Nýsamþykktar reglur um Siðanefnd Prestafélags Íslands eru í heild sinni aftast í fundargerð þessari.

Önnur mál

Fundarstjóri las upp tillögu frá sr. Gunnari Sigurjónssyni:

Aðalfundur Prestafélags Íslands haldinn á Húsavík 24. apríl 2007 skorar á kirkjustjórnina að hlutast til um það að sáttaferli sé ófrávíkjanlegur þáttur í ákvarðanatöku varðandi stöðu presta innan þjóðkirkjunnar þegar ljúka á 5 ára ráðningartímabili starfandi prests með auglýsingu embættisins gegn vilja prestsins.

Setja þarf skýrar reglur um ábyrgð þjóðkirkjunnar gagnvart þjónandi prestum.

Aðalfundur P.Í. áréttar sameiginlega ábyrgð prests og safnaðar í slíku sáttaferli og skorar á kirkjustjórnina að sýna frumkvæði í slíkum málum.

Sr. Gunnar Sigurjónsson

Sagði að enginn sáttafundur hefði verið haldinn í máli sr. Carlosar A. Ferrers í Tjarnarprestakalli. Úrskurðarnefnd hefði aðeins farið yfir hvort rétt hefði verið staðið að ferlinu. Hefði hún átt að mati hans að skoða allt málið í heild sinni. Þegar mál af þessum toga koma upp er mikilvægt að leita allra sáttaleiða – í sáttaferlinu ætti samábyrgð að koma í ljós. Væntir þess að aðalfundur samþykki þessa tillögu og henni verði fylgt eftir á prestastefnu.

Sr. Örn Bárður Jónsson gerði tillögu um orðalagsbreytingu að í stað lokaorða fyrstu málsgreinar þar sem stendur gegn vilja prestsins kæmi gegn vilja hans.

Tillagan var samþykkt samhljóða með nefndri breytingartillögu.

Sr. Gunnar Sigurjónsson

Lýsti ánægju sinni með samþykkt tillögunnar og taldi samþykkið mjög mikilvægt.

Fundarstjóri kynnti tvær tillögur um Prestssetrasjóð. Sú fyrri frá sr. Kristni Ágústi Friðfinnssyni og hljóðar svo:

Aðalfundur Prestafélags Íslands haldinn á Húsavík 24. apríl 2007 ályktar eftirfarandi: Fulltrúi félagsins í stjórn Prestssetrasjóðs skal valinn á aðalfundi P.Í. og skal hann vera úr hópi þeirra presta sem gæta prestsseturs að lögum.

Seinni tillagan frá dr. Sigurði Árna Þórðarsyni og sr. Geir G. Waage og hljóðar svo:

Aðalfundur Prestafélags Íslands haldinn á Húsavík 24. apríl 2007 beinir því til stjórnar að fulltrúi félagsins í stjórn Prestssetrasjóðs verði prestur á prestssetri.

Sr. Kristinn Ágúst Friðfinnsson tók til máls og sagði að það væri afar mikilvægt að prestur sæti í stjórn Prestssetrasjóðs og hefði afgerandi umboð frá aðalfundi P.Í.

Sr. Solveig Lára Guðmundsdóttir sagði að ef fyrri tillagan yrði samþykkt þá þyrfti ekki að bera þá seinni upp.

Sr. Ólafur Jóhannsson.

Styður seinni tillöguna um að stjórnin komi beint að því að skipa fulltrúa í stjórn Prestssetrasjóðs. Stjórnin hafi hverju sinni gott yfirlit yfir þessi mál enda komi þau iðulega til umfjöllunar hjá henni.

Sr. Sigurður Grétar Sigurðsson

Telur mikilvægt að fram komi hvert hlutverk þessa fulltrúa sé og að ljóst verði hvað hann geri. Þá sé líka mikilvægt að viðkomandi prestur hafi trausta þekkingu á prestssetursmálum en hann þurfi ekki endilega að sitja á prestssetri.

Sr. Solveig Lára Guðmundsdóttir

Ítrekaði að mikilvægt væri að sjónarmið presta á prestssetrum kæmu fram í stjórn Prestssetrasjóðs. Fulltrúi P.Í. væri ekki vanhæfur í neinu máli nema því sem snerti prestssetrið sem hann sæti.

Sr. Sigurður Grétar Sigurðsson

Benti á að óbeint væru menn að fjalla um sín eigin kjör þegar þeir ræddu önnur prestssetur.

Sr. Solveig Lára Guðmundsdóttir

Ekki spurnig um að ræða kjör heldur að fulltrúinn hefði ákveðna sýn í málefnum prestssetra og allt það er þau varðaði.

Sr. Gunnar Sigurjónsson

Mikilvægt að sá prestur er situr í stjórn Prestssetrasjóðs búi á prestssetri. Á þeim brenna þessi mál heitast. Þarna sé verið að gæta hagsmuna prestssetranna sem slíkra.

Fundarstjóri bar upp tillögu sr. Kristins Ágústs Friðfinnssonar og var hún samþykkt með 25 atkvæðum en á móti voru 19.

Þá var komið að því að kjósa fulltrúa í stjórn Prestssetrasjóðs. Komu fram tillögur um þessa presta: Sr. Halldóra Þorvarðardóttir, sr. Þorgrímur Daníelsson, sr. Solveig Lára Guðmundsdóttir. Atkvæði féllu svo:

Sr. Þorgrímur Daníelsson 23

Sr. Halldóra Þorvarðardóttir 11

Sr. Solveig Lára Guðmundsdóttir 19

Tveir seðlar voru auðir.

Sr. Þorgrímur Daníelsson réttilega kjörinn sem fulltrúi P.Í. í stjórn Prestssetrasjóðs.

Samþykkt var að sá prestur sem næstflest atkvæði fékk verði varamaður en það var sr. Solveig Lára Guðmundsdóttir

Sr. Þórir Jökull Þorsteinsson

Vill að prestar íhugi eftirfarandi: Við lifum á þeim tímum þegar vantrú er áberandi og þá efast er um rétt kirkjunnar til að starfa. Kirkjan hefur verið samviska þjóðarinnar. Sú hugsun rík að þjóðin sé kirkjan. Gengið sé að kirkjunni sem hverri annarri þjónustustofnun fremur en trúfélagi sem bundið sé af grundvelli sínum. Ennfremur vill hann vekja athygli á því að við lifum á þeim tímum þegar kirkjan rekst á takmörk sín. Kirkjan á erindi við alla menn en hún er í ákveðinni hættu á þessum tímum. Rógsvélar geta gengið í kringum okkur að tilefnislausu. Hvetur presta til að hafa augu með því fyrir hvað við stöndum þegar að þjónustu okkar kemur.

Sr. Sighvatur Karlsson

Býður presta velkomna til Húsavíkur. Vekur athygli á makaferðinni sem farin verður á morgun. Minnir á móttöku sveitartjórnarmanna í Safnahúsinu kl. 20.30 í kvöld.

Sr. Carlos Ari Ferrer

Þakkar fyrir stuðning sem honum hefur verið sýndur í því máli sem hann hefur glímt við. Sá stuðningur sýnir að hann er ekki einn á báti. Þakkar stjórn P.Í. fyrir að standa við bak sér sem og félögum í P.Í. Stuðningurinn ómetanlegur – hann óskar sér einskis nema réttlætis. Hyggst sækja aftur um embættið og vonar að hann nái því. Spyr í lokin hversu gott það sé að sami aðili sálgæti, rannsaki og stýri ferli og gefi ráð í máli sem þessu. Ennfremur hversu gott það sé að sama nefnd ákveði að auglýsa embætti og taki ákvörðun í máli þess sama manns og vikið var.

Fundarstjóri minnir á að fyrirhugað sé að hittast á veitingastaðnum Sölku og verði þar léttar veitingar í boði P.Í. frá kl. 22-00.00.

Fundarstjóri þakkar fyrir fundinn og samstarfið við samfundarstjóra sinn.

Sr. Ólafur Jóhannsson, formaður, tók til máls og þakkaði fundarstjórum fyrir stjórn fundarins. Lýsti ánægju sinni með fundinn og sérstaklega að siðareglur skyldu hafa verið afgreiddar.

Lagði til að fundurinn sendi fjármálastjóra Biskupsstofu, frú Sigríði Dögg Geirsdóttur, samúðarkveðju og blóm vegna andláts eiginmanns hennar. Var það samþykkt einum rómi.

Í lokin færði formaður fráfarandi stjórnarmönnum gjöf frá P.Í. í þakkarskyni fyrir unnin störf. Sleit síðan fundi kl. 18.27.

Hreinn S. Hákonarson,

fundarritari

---------------------