Djáknafélag Íslands

Gleðileg jól - með jólahugvekju flutt í Kolaportinu

Ragnheiður Sverrisdóttir — Tue, 20 Dec 2011 16:15:15 +0000

Senn líkur aðventunni og jólin ganga í garð. Ég vil óska þér gleðilegra jóla með hugvekju sem flutt var 18. desember í guðsþjónustu í Kolaportinu.

Lúkasarguðspjall 2.1-14

Hér inni er fólk sem hefur heyrt jólaguðspjallið milljón sinnum – eða næstum því. Mér finnst ég vera í þeim hóp og ég hef ekki bara heyrt það oft og mörgum sinnum heldur líka sagt frá því. Það er erfitt að viðurkenna það en eitt sinn var bara nóg komið. Sagan var orðin innantóm fyrir mér, sífelld endurtekning.

En allar sögur hafa eitthvað meira fólgið í sér en nákvæmlega það sem sagt er. Þannig er jólaguðspjallið, það er mikil saga á bak við stutta sögu. Guðspjallið er frásaga af fæðingu barns. Þegar fréttir berast af fæðingunni kemur fólk til að heimsækja foreldra og barn alveg eins og við gerum í daga þegar barn fæðist. Við förum til að óska til hamingju með barnið og fá að sjá litlu veruna sem er svo ógnarlítil og umkomulaus. Svo segjum við stundum –ó, hvað þú ert yndisleg og mikið krútt. Margir verða alveg hugfangnir og fá að klappa barninu og finna hversu mjúkt það er. Hugsið ykkur hvað margt fallegt hefur verið sagt um okkur og við okkur sem við höfum fengið að fara með út í lífið. Við erum yndisleg. Þetta hafa hirðarnir örugglega hugsað eða jafnvel sagt við ungabarnið Jesú þar sem það lá umkomulaust í jötunni.

Það var hins vegar þetta með englana. Þeir sögðu hirðunum frá fæðingu þessa litla barns. Þeir sögðu þeim sögu á bak við komu barnsins. Það er sagan sem verið er að segja með jólaguðspjallinu. Þetta er ekki einhver saga heldur sagan, boðskapurinn, gleðifréttirnar, fagnaðarboðskapurinn. Ekki vera hræddir þegar þið heyrið þennan boðskap sögðu englarnir við strákana úti í haga. En þeir urðu óskaplega hræddir þegar allt varð bjart um miðja nótt. Þegar engillinn var búinn að róa þá gat hann sagt þeim boðskapinn um að frelsari væri fæddur.

Ég held að þeir hafi fengið að upplifa himnaríki á þessari stundu – himnaríki sem er bjart, hlýtt og fallegt enda segir “dýrð Drottins ljómaði í kringum þá.” Himnaríki opnaðist yfir þeim og þeir fengu það hlutverk að fara til frelsarans, lítils fátæks barns og veita því lotningu. Þeir sögðu Maríu og Jósef frá því sem þeir upplifðu og þau fengu það staðfest hvert barnið var og hvaða hlutverk það hafði með því að fæðast. Ekki veitti foreldrunum af að fá enn eina staðfestingu á að barnið væri Guðs sonur. Það var svo ótrúlegt enda segir að María hafi munað allt sem hirðarnir sögðu og hafi hugleitt það. Hugleitt komu Krists sem hún og Jósef voru útvalin til að ala upp. Hvílíkt verkefni – kannski hafa þeim fallist hendur. En hún átti bænina og gat þannig rætt við Guð um þetta vandasama uppeldi. Það er alltaf vandi að ala upp barn en fæðing þessa barns var tilkynnt af englum af himnum ofan – uppeldið skipti því miklu máli fyrir barnið og hlutverk þess.

þó ég geti orðið leið á að heyra jólaguðspjallið milljón sinnum verð ég ekki leið á að heyra boðskapinn sem englarnir fluttu. Ég tek á móti þeim boðskap, trúi því að Jesús sé frelsari minn og allra annarra. Hann frelsaði frá fjötrum sem mannlífið lagði á það – og leggur á okkur. Hann læknaði og huggaði. Þetta gerist enn. Hann læknar, linar þjáningu og tekur okkur loks til sín. Við biðjum til hans í dag einmitt vegna þess að hann vill veita okkur von í öllum aðstæðum

En í Jóhannesar guðspjalli er sagt frá fólki sem trúði ekki á að Jesús væri frelsari heimsins. Það er sagt með orðunum „Hann kom til eignar sinnar en hans eigið fólk tók ekki við honum.“ (Jóh. 1. 11) Þannig er það líka í dag og það verðum við að virða. Um þá sem tóku við honum er sagt: „En öllum þeim sem tóku við honum gaf hann rétt til að verða Guðsbörn.“(Jóh. 1.12)

Lokaorð

Hvað ferðu með þér héðan í dag? Það sem ég vona er að þú hafir með þér tilfinninguna að boðskapur jólanna skipti máli og að innihald þeirra sé boðskapurinn um að frelsarinn hafi fæðst, innihald sem kaupmenn eru ekki að selja heldur fæst ókeypis hvar sem er því Guð er alls staðar nálægur okkur til að elfa okkur og trú okkar á hinn eina sanna Guð sem kom í heiminn í hógværð sem lítið barn.

„Dýrð sé Guði í upphæðum og friður á jörðu og velþóknun Guðs yfir mönnunum.“ (Lúk. 2.14) Amen.

GLEÐILEG JÓL.

Ráðgjafa - og sálgæslusetur tveggja djákna

Ragnheiður Sverrisdóttir — Fri, 21 Oct 2011 11:53:37 +0000

Tveir djáknar opnuðu formlega starfssemi sína Heild, ráðgjafa - og sálgæslusetur, í byrjun september og er hún staðsett við Laugarveg 59 á 4. hæð. Þessir frumkvöðlar eru Guðrún Kristín Þórsdóttir og Kristín Sigríður Garðarsdóttir djáknar. Kristín er í mastersnámi í starfs- og námsráðgjöf en Guðrún er starfandi í hlutastarfi í Hátúni í tengslum við Laugarneskirkju og löggiltur leiðsögumaður.

Hugmyndin hjá okkur kviknaði í reiðtúr snemma vors 2010 og síðan fengu við aðstöðu að Hólum um sumarið til að vinna hugmyndir okkar áfram. Hugmyndafræði Heildar og undirbúningur að námsskeiðshaldi vannst vel í því dásamlega og magnaða umhverfi sem Hólar eru. Enda vorum við stöllur alltaf ákveðnar í að tengja starfssemi okkar náttúrunni, kröftum hennar svo og vináttunni.

Báðar höfum við tekið virkan þátt í 12 spora vinnu innan kirkjunnar og utan og því lá beinast við að undirbúa námskeið sem byggði að einhverju leyti á þeirri vinnu. Jafnframt er hugmundafræðin á bak við starfssemina 12 sporin og sú reynsla sem við höfum af þeirri góðu og markvissu vinnu, sem hefur hjálpað svo mörgum til betra og farsælla lífs.

Reynsla okkar er líka sú að þeir sem fá mest út úr vinnu í 12 sporunum eru þeir sem sækja jafnframt viðtalstíma til að vinna sig í gegnum sporin.

Spurningar vöknuðu hjá okkur, hvað verður um það fólk sem kemur á kynningarfundina og hverfur svo á braut? Hvað verður um þá þátttakendur sem detta út á miðri önn? Með þetta í huga undirbjuggum við styttra fjögurra kvölda námsskeið út frá 12 sporunum og fyrri reynslu. Farið verður á stað með slíkt námsskeið í byrjun nóvember.

Heild sinnir aðallega viðtölum við konur, en það er ekki þar með sagt að karlar séu ekki velkomnir líka. Reynsla okkar liggur aðallega hjá konum og í þeirra reynslu og lífssögu. Við horfum m.a. til aðstandenda langveikra, fólki sem er á krossgötum í sínu lífi vegna veikinda, áfalla eða ofbeldis af ýmsum toga.

Við viljum hvetja djákna og annað starfsfólk kirkjunnar til að láta fólk vita af starfssemi okkar. Heild veitir ráðgjöf, sálgæslu og leiðsögn í einkaviðtölum og hægt er að hafa samband í gegnum heimasíðu Heildar, http://heild.is/ og í síma er 445-5552

Með kærum kveðjum Guðrún Kristín Þórsdóttir og Kristín Sigríður Garðarsdóttir

Félagsfundur 18. okt.

Nína Björg Vilhelmsdóttir — Sun, 16 Oct 2011 22:37:36 +0000

Þriðjudagskvöldið 18. október klukkan 17:30 er félagsfundur hjá félaginu. Komandi kirkjuþing verður rætt og þau mál sem fyrir það liggja. Kirkjuþingsfulltrúar Kjalarness- og Reykjavíkurprófastdæma (eystra og vestra) hafa verið boðaðir á fundinn. Fundurinn verður í Grensáskirkju. Hægt er að lesa yfir mál sem liggja fyrir þingið á heimasíðu kirkjunnar. Allir hvattir til að mæta.

Fimmtudagskvöldið 20. okt. er djáknakvöld, milli klukkan 20 og 22, hjá Hjálparstarfi kirkjunnar. Þá eru allir djáknar boðaðir til að leggja hönd á plóg.

Djáknar leiða guðsþjónustu

Ragnheiður Sverrisdóttir — Fri, 07 Oct 2011 17:17:21 +0000

Djáknarnir Gréta Konráðsdóttir, Fjóla Haraldsdóttir og Nanna Guðrún Zöega munu leiða guðsþjónustu í Bessastaðakirkju 9. október kl. 20. Þær hafa allar starfað í Bessastaðasókn. Verið velkomin. Á myndinni er Fjóla Haraldsdóttir sem nú er djákni á hjúkrunarheimilinu Mörk og Nína Björg Vilhelmsdóttir, formaður Djáknafélagsins. Myndin er tekin á fundi í félaginu 3. október 2011.

Myndir frá vígslu djákna- og prests í Skálholtsdómkirkju

Ragnheiður Sverrisdóttir — Fri, 07 Oct 2011 11:06:47 +0000

Það var hátíð í Skálholti við djákna og prestsvígslu síðasta sunnudag, 2. október. Ný vígður vígslubiskup, sr. Kristján Valur Ingólfsson vígði þær Ástu Ágústsdóttur og Rut G. Magnúsdóttur til djákna og Nönnu Sif Svavarsdóttur til prests. Vígslu lýsti sr. Halldóra Þorvarðardóttir og vígsluvotta voru sr. Kristinn Ágúst Friðfinnsson, sr. Óskar H. Óskarsson, sr. Ragnheiður Jónsdóttir, sr. Sigríður Gunnarsdóttir, sr. Sigurður Arnarsson og djáknarnir Eygló J. Gunnarsdóttir, Fjóla Haraldsdóttir, Ragnheiður Sverrisdóttir. Sr. Egill Hallgrímsson þjónaði fyrir altari ásamt vígslubiskupi. Tónlistin var í höndum Jóns Bjarnasonar organista, kórs Selfosskirkju undir stjórn Jörg Sonderemann.
Kirkjan var fullsetin af fólki úr söfnuðum þeirra sem vígðust, Selfoss, Kársnesi og Lágafelli og að sjálfsöðu voru margir ættingar og vinir viðstddir. Á eftir var kirkjukaffi í skólanum sem allir þáðu enda var veðrið ekki gott, rigning og rok.

Djákna- og prestsvígsla

Ragnheiður Sverrisdóttir — Fri, 30 Sep 2011 15:25:22 +0000

Djákna- og prestsvígsla verður í Skálholtsdómkirkju 2. október kl. 14. Tveir djáknar verða vígðir, Ásta Ágústsdóttir til Kópavogsprestakalls og Rut G. Magnúsdóttir til Vinaleiðar í Lágafellsskóla í Mosfellsprestakalli. Ninna Sif Svavarsdóttir verður vígð til prests til Selfossprestakalls. Sr. Kristján Valur Ingólfsson, vígslubiskup annast vígsluna en þetta er fyrsta djákna- og prestsvígsla hans en hann tók við embætti vígslubiskups í Skálholtsbiskupsdæmi 18. september s.l.

Sjálfboðaliðar fá viðurkenningu

Ragnheiður Sverrisdóttir — Fri, 23 Sep 2011 14:59:39 +0000

Bessastaðasókn fékk viðurkenningu og þakklæti fyrir öflugt sjálfboðastarf á degi kærleiksþjónustunnar 18. september. Afhent var innrammað skjal frá Eurodiaconia sem biskup Íslands undirritaði. Alls eru um 60 manns sem vinna margvísleg verkefni sem sjálfboðaliðar. Níu eru í sóknarnefnd, sjö í sunnudagaskólanum, sjö í starfi aldraðra, tvö í kirkjustarfi á frístundaheimili, einn í fermingarfræðslu, átta á sumarnámskeiðum, ein annast tólfsporastarfið og 24 eru í Álftaneskórnum. Launað starfsfólk vinnur með sjálfboðaliðunum en án þeirra gæti söfnuðurinn ekki haft allt það fjölbreytta starf sem unnið er í söfnuðinum. Presturinn, sr. Hans Guðberg Alfreðsson og djákninn, Gréta Konráðsdóttir eru stolt yfir þessum frábæru samstarfsmönnum sínum og segja að félagasamtök á Álftanesi leggi einnig mikið af mörkum en margir eru bæði vikir á þeim vettvangi og í kirkjunni.

Málþing um lífsgleði efri áranna

Ragnheiður Sverrisdóttir — Fri, 16 Sep 2011 16:57:00 +0000

Málþingið „Lífsgleði efri árnna“ verður í Grensáskirkju 19. september kl. 13-16.30. Það er opið fyrir alla og það þarf ekki að skrá sig á það. Það eru Ellimálanefnd Þjóðkirkjunnar og Ellimálaráð Reykjavíkurprófastsdæma sem boða til þessa þings. Sjá hér.

Dagur kærleiksþjónustunnar 2011

Ragnheiður Sverrisdóttir — Sat, 10 Sep 2011 17:53:14 +0000

Dagur kærleiksþjónustunnar í þjóðkirkjunni verður haldinn 18. september. Í ár er athyglinni beint að starfi sjálfboðaliða sem fást við margvísleg verkefni í kirkjunni.

Sjálfboðaliðar taka þátt í öllu starfi kirkjunnar, í stjórnun, fræðslu, boðun, tónlist og kærleiksþjónustu. Sjálfboðaliðar starfa í sóknarnefndum sem bera meðal annars ábyrgð á rekstri og umsýslu sóknanna og kirkjuhússins. Sjálfboðaliðar taka þátt í heimsóknarþjónustu, samtölum, barna- og æskulýðsstarfi, og aðstoða við kirkjustarfið á margvíslegan hátt. Þá er þéttriðið stuðningsnet sjálfboðaliða sem starfar við innanlandsaðstoð Hjálparstarfs kirkjunnar.

Í tilefni dagsins verður útvarpsguðsþjónusta frá Bessastaðakirkju kl. 11 með þátttöku sjálfboðaliða úr sókninni. Að henni lokinni verður boðið til samveru í safnaðarheimilinu Brekkuskógum, þar sem Bessastaðasókn verður afhent viðurkenning í tilefni af Alþjóðaári sjálfboðaliðans en sóknin hefur sett eflingu sjálfboðastarfs í forgang í starfi sínu og uppbyggingu. Að viðurkenningunni standa Evrópusamtök kærleiksþjónustunnar, Eurodiaconia, en fulltrúi þeirra verður viðstaddur athöfnina.

Fátækt, kreppa og staða sjálfboðastarfs

Ragnheiður Sverrisdóttir — Sat, 10 Sep 2011 17:39:42 +0000

Fátækt, kreppa og staða sjálfboðastarfs verða til umræðu á morgunverðarfundi 16. september kl. 8.15-10 í Grensáskirkju. Heather Roy, framkvæmdastjóra Eurodiaconia fjallar um þessi málefni en þau eru ofarlega á baugi hjá samtökunum. Eurodiaconia eru samtök félaga og kirkna í Evrópu sem sinna kærleiksþjónustu.

www.eruodiaconia.org Þjóðkirkjan gekk í Eurodiaconia 2007. Dagskráin fer fram á ensku.
Dagskrá
8.15 Morgunverður
8.30 Upphafsbæn
8.35 Heather Roy, framkvæmdastjóri Eurodiaconia: Fátækt, kreppa og
sjálfboðastarf
9.20 Kærleiksþjónusta úti á vettvangi og í Innanlandsaðstoð Hjálparstarfs
kirkjunnar. Ragnheiður Sverrisdóttir, djákni og Vilborg Oddsdóttir, félagsráðgjafi.
9.35 Fyrirspurnir og umræður

Fundarstjóri: Magnea Sverrisdóttir, djákni