Grensáskirkja

Sunnudagur 12. febrúar. Biblíudagurinn.

Áslaug Sif Guðjónsdóttir — Tue, 31 Jan 2012 12:26:16 +0000

Morgunverður kl. 10 og bænastund kl. 10:15.
Barnastarf kl. 11, umsjón hefur Helga Kolbeinsdóttir.
Messa kl. 11. Altarisganga.
Samskot til Hins ísl. biblíufélags. Messuhópur þjónar.
Kirkjukór Grensáskirkju syngur og organisti er Árni Arinbjarnarson.
Prestur sr. Ólafur Jóhannsson.
Molasopi eftir messu.

Sjálfstyrkingarnámskeið fyrir konur á vegum þjóðkirkjunnar

Áslaug Sif Guðjónsdóttir — Fri, 27 Jan 2012 13:57:13 +0000

Konur eru konum bestar
Sjálfstyrkingarnámskeið fyrir konur verður haldið í safnaðarheimili Grensáskirkju mánudagana 13. og 20. febrúar frá kl. 19-22.

Námskeiðið miðar að því að byggja upp sjálfsmynd kvenna og skapa þeim vettvang til að kynnast sjálfum sér betur í góðu samfélagi við aðrar konur. Fjallað verður um mikilvægi þess að styðja hver við aðra og standa með sjálfri sér. Ýmsum spurningum er velt upp og sögur Biblíunnar eru notaðar til að varpa ljósi á viðfangsefnið.

Námskeið þetta hefur notið fádæma vinsælda innan kirkjunnar síðustu 20 árin. Það hefur verið haldið víðsvegar um landið og margar konur lýst ánægju sinni með það.
Námskeiðið er opið öllum konum 18 ára og eldri og kostar 3000 krónur.

Leiðbeinandi er sr. Petrína Mjöll Jóhannesdóttir

Skráning á námskeiðið er í gegnum tölvupóst á netfangið petam@mi.is og/eða grensaskirkja@kirkjan.is eða í gegnum síma Grensáskirkju 528-4410

Sýning á býsantínskum íkonum.

Áslaug Sif Guðjónsdóttir — Tue, 29 Nov 2011 12:11:36 +0000

Gríski listamaðurinn Konstantinos Zaponidis heldur sýningu í forsal Grensáskirkju á íkonum sem hann hefur málað. Konstantinos nam íkonamálun í munkríkinu Athos í norður Grikklandi og málar samkvæmt aldagamalli býsantínskri hefð. Sýningin stendur yfir frá 1. desember 2011 og stendur yfir til áramóta. Opnunartími sýningarinnar er frá 10 til 15 virka daga nema fimmtudaga er opið frá 10-19. Um helgar er opið frá 13 til 17. Einnig er sýningin opin á messutíma.
Sýningin er öllum opin og er sölusýning.

Barnakór í Grensáskirkju

Áslaug Sif Guðjónsdóttir — Wed, 07 Sep 2011 11:42:44 +0000

Í vetur verður starfræktur barnakór fyrir 6-9 ára gömul börn í safnaðarheimili Grensáskirkju og verða kóræfingar á fimmtudögum frá kl. 16:00 til 17:00. Fyrir þau börn sem eru á frístundaheimilum Álftamýrarskóla og Hvassaleitisskóla verður rúta sem kemur og sækir þau rétt fyrir kl. 16:00 og fer með þau í Grensáskirkju. Foreldrar geta síðan sótt börn sín þangað eftir kóræfingu og verður kirkjan opin til kl. 17:15 eins og frístundaheimilin. Kórinn og rútuferðirnar eru foreldrum að kostnaðarlausu.

Kórstjóri er Ásta Haraldsdóttir sem hefur áður starfað með kórum á vegum kirkjunnar en hún hefur einnig starfað með fleiri kórum meðal annars Stúlknakór Reykjavíkur og Stúlknakór Háteigskirkju.

Efnisskrá vetrarins verður fjölbreytt og skemmtileg og einnig er gert ráð fyrir því að þau fái að koma fram og syngja fyrir aðra við einhver tækifæri.

Foreldrar/forráðamenn sem vilja nýta rútuferðina frá frístundaheimilum í sókninni til kirkjunnar vinsamlega skilið leyfisbréfi til starfsfólks frístundaheimilisins.

Nánari upplýsingar er að fá í Grensáskirkju s. 528-4410 og hjá Ástu í síma 892-3162.
Öll börn eru hjartanlega velkomin.

Sunnudagaskólinn.

Áslaug Sif Guðjónsdóttir — Sun, 04 Sep 2011 11:04:45 +0000

Boðið er upp á sunnudagaskóla samhliða guðsþjónustum á sunnudögum kl. 11. Fræðslan miðast við börn á aldrinum 2-6 ára. Barnastarfið byrjar sunnudaginn 11. september kl. 11. Umsjón í vetur hafa Nanda María og Helga Kolbeinsdóttir. Öll börn hjartanlega velkomin.

Kyrrðarstundir og hversdagsmessur.

Áslaug Sif Guðjónsdóttir — Mon, 22 Aug 2011 07:00:00 +0000

Kyrrðarstundir eru í hádeginu alla þriðjudaga. Stundin hefst með orgelleik en síðan er sunginn sálmur, lesinn ritningarlestur og gengið til altaris. Eftir altarisgönguna er fyrirbænastund þar sem beðið er fyrir bænarefnum sem borist hafa. Stundinni í kirkjunni lýkur upp úr kl. 12:30 og þá er hægt að kaupa léttan málsverð á sanngjörnu verði. Kyrrðarstundir byrjar aftur eftir sumarfrí þriðjudaginn 6. september.

Hversdagsmessur alla fimmtudaga kl. 18:10. Um er að ræða einfalda messu á rúmhelgum degi.
Þorvaldur Halldórsson leiðir söng en einnig er ritningarlestur, hugleiðing út frá orði Guðs og altarisganga. Messunni lýkur rétt fyrir kl. 19:00. Tilvalið er að koma við í kirkjunni að loknum vinnudegi eða skreppa þangað rétt fyrir kvöldmat í hversdagsmessu. Fyrsta hversdagsmessa haustsins verður fimmtudaginn 1. september. Allir hjartanlega velkomnir.
.

Samverustundir eldri borgara.

Áslaug Sif Guðjónsdóttir — Sun, 21 Aug 2011 13:13:34 +0000

Samverustund eldri borgara er alla miðvikudaga kl 14 í safnaðarheimilinu.
Allir velkomnir.

12 spora starf verður í Grensáskirkju í vetur, á fimmtudagskvöldum frá kl. 19:15-21:15

Áslaug Sif Guðjónsdóttir — Mon, 15 Aug 2011 00:00:00 +0000

Fyrsta kynningarkvöldið verður fimmtudaginn 8. september. Það kvöld og næstu tvö fimmtudagskvöld er hægt að koma og kynna sér starfið án allra skuldbindinga um áframhaldandi þátttöku en hóparnir loka 29. september. Tólf spora starfið er andlegt ferðalag, sjálfsstyrking, sem byggist á því að vinna með sjálfa(n) sig en jafnframt að gefa og þiggja í hópi. Ekki er gengið út frá því að þátttakendur eigi við nein sértæk vandamál að stríða heldur er um að ræða almenna uppbyggingu í því skyni að kynnast sínum innri manni nánar og geta þannig betur tekist á við viðfangsefni og áskoranir lífsins.

Fermingarstarf í Grensáskirkju 2011-2012.

Áslaug Sif Guðjónsdóttir — Sat, 06 Aug 2011 15:50:26 +0000

Bréf dagsett 6. mai var sent heim til ungmenna sem eru í þjóðkirkjunni, búa í Grensássókn og fæddust árið 1998 (7. bekkur). Í því eru upplýsingar um tilhögun fermingarstarfa í Grensáskirkju vegna ferminga 2012.

Um tvær leiðir er að velja í fermingarundirbúningi, A og B:

Leið A
Væntanlegum fermingarbörnum gefst kostur á að sækja nokkurra daga sumarnámskeið stuttu áður en skóli hefst á ný í ágúst (sjá dagsetningar síðar í bréfinu). Þessi leið hefur gefist vel undanfarin ár. Hún léttir á dagskrá ungmennanna yfir veturinn því þau þurfa ekki að sækja vikulegar fræðslustundir.

Leið B
Að öðrum kosti sækja ungmennin vikulegar fræðslustundir allan veturinn frá byrjun sept. og fram að fermingum. Þær fræðslustundir verða á miðvikudögum kl. 15:30-16:10.

Báðir hópar (A og B) sækja guðsþjónustur, taka þátt í öðrum (u. þ. b. mánaðarlegum) samverum og verkefnum fermingarstarfsins og fara á tveggja daga námskeið í Vatnaskógi.
Í báðum hópum er stuðst við bókina „Líf með Jesú“ sem notuð hefur verið um árabil.

Sumarnámskeiðið (leið A) verður eftirtalda daga:
Þriðjud. 16. ágúst kl. 9-16
Miðvikud. 16. ágúst kl. 9-16
Fimmtud. 17. ágúst kl. 9-16
Föstud. 19. ágúst kl. 9-13
Sunnud. 21. ágúst kl. 11-12 (messa)
Vænst er þátttöku foreldra sunnud. 21. ágúst kl. 11-13 (messa og fundur eftir messu).
Ætlast er til að unglingarnir séu allan tímann alla dagana. Að fenginni reynslu er alveg útlokað að koma inn í námskeiðið eftir að það hefst eða sleppa úr dögum.

Vorið 2012 verður fermt í Grensáskirkju
- pálmasunnudag 1. apríl kl. 13:30
- annan í páskum 9. apríl kl. 11:00
- sunnud. 15. apríl kl. 13:30
Skráning í fermingarstarfið er hafin á heimasíðu safnaðarins kirkjan.is/grensaskirkja en slóðin er
kirkjan.is/grensaskirkja/safnadarstarf/skraning_fermingar_2012/
Vinsamlegast skráið væntanleg fermingarbörn fyrir 1. júní svo við vitum tímanlega hver þátttakan verður.

Með kærri kveðju og von um gott samstarf,
sóknarprestur og starfsfólk Grensáskirkju

Sjálfboðaliðar

Áslaug Sif Guðjónsdóttir — Fri, 01 Jul 2011 12:14:46 +0000

Mikið sjálfboðaliðastarf er unnið í kirkjunni. Sóknarbörnum gefst kostur á að taka þátt í ýmsum verkefnum í safnaðarstarfinu. Í stórum söfnuði er ávallt þörf fyrir sjálfboðaliða sem vilja láta gott af sér leiða og vera í góðum félagsskap.

Það er ekkert aldurstakmark allir eru velkomnir og hægt er að finna eitthvað við allra hæfi. Engin þarf að binda sig við neitt fast frekar en hann vill.

Ef þú lesandi góður hefur áhuga á að ganga í hóp sjálfboðaliða Grensáskirkju hafðu þá endilega samband í síma 528-4410 eða á netfang grensaskirkja@kirkjan.is

Kveðja, starfsfólk Grensáskirkju.