Vestfjarðaprófastsdæmi

Embætti sóknarprests á Þingeyri með skyldur héraðsprests var auglýst núna í vor.  Valnefnd prestakallsins, sem í sitja níu manns, hefur lokið störfum.  Eftir að hafa farið yfir umsóknir og boðað nokkra umsækjendur í viðtal komst valnefndin að þeirri niðurstöðu að leggja til við biskup Íslands að sr. Hildur Inga Rúnarsdóttir yrði skipuð sem næsti sóknarprestur á Þingeyri.

Biskup Íslands hefur auglýst laust til umsóknar embætti sóknarprests í Bolungarvíkurprestakalli, Vestfjarðaprófastsdæmi frá og með 1. ágúst 2012.  Umsóknarfrestur rennur út 20. júní 2012. Umsóknir sendist Biskupi Íslands, Biskupsstofu, Laugavegi 31, 150 Reykjavík.

Í Bolungarvíkurprestakalli eru fjórar sóknir, Hólssókn (887 íbúar), Súðavíkursókn (167 íbúar), Vatnsfjarðarsókn (16 íbúar) og Ögursókn (11 íbúar). Sóknarkirkja er í hverri sókn. Bolungarvíkurprestakall á samstarfssvæði með Holtsprestakalli, Ísafjarðarprestakalli og Þingeyrarprestakalli. Prestssetur og skrifstofa sóknarprests er í Bolungarvík.

Valnefnd velur sóknarprest skv. starfsreglum um val og veitingu prestsembætta nr. 1109/2011 og er stuðst við óháðan ráðgjafa í öllu umsóknarferlinu. Heimilt er að óska eftir því að almennar prestskosningar fari fram samkvæmt 15. gr. starfsreglna nr. 1109/2011.

Upplýsingar um embættið og helstu lög og reglur sem um starfið gilda, eru veittar hjá sóknarpresti Bolungarvíkurprestakalls og á Biskupsstofu.

Í tilkynningu frá sr. Agnesi segir:  

Nú þegar úrslit liggja fyrir í biskupskjörinu er mér þakklæti efst í huga. Þakklæti til þeirra er hvöttu mig til að gefa kost á mér til embættis  Biskups Íslands. Eins er ég þakklát öllum þeim er hafa gengið með mér veginn undanfarnar vikur, stutt mig, hjálpað mér og unnið með mér. Bið ég Guð að launa það allt og blessa þau öll.

Sú vegferð sem við höfum verið á undanfarnar vikur hefur verið okkur sem störfum í Kirkjunni til uppörvunar og gagns. Mitt fyrsta verk verður að hlusta, heyra raddir fólks sem starfar á mismunandi  sviðum kirkjunnar, sýna umhyggju og mynda samstöðu um að fagnaðarerindið nái eyrum fólks.

Ég er þakklát Guði mínum fyrir að hafa kallað mig til þjónustunnar og bið þess að mér auðnist að leiða kirkjuna Drottni til dýrðar og þjóðinni til farsældar.  Boðskapur hennar og þau gildi er kristin trú felur í sér eru sannarlega til þess fallin að gleðja, efla, hugga, styrkja og finna ráð við hvers konar vanda.
Með bæn Reinhols Niebuhr, æðruleysisbænina í huga, bið ég Guð að leiða okkur í lífi og starfi.

Guð – gef mér æðruleysi
til að sætta mig við það sem ég fæ ekki breytt,
kjark til að breyta því sem ég get breytt
og visku til að greina þar á milli.

Sr. Agnes M. Sigurðardóttir, prófastur Vestfirðinga hefur verið kjörin biskup Íslands.  Á kjörskrá voru 502 en atkvæði greiddu 477 eða 95%.  Sr. Agnes hlaut 307 atkvæði, rúm 64%, en mótframbjóðandi hennar, sr. Sigurður Árni Þórðarson hlaut 152 atkvæði eða 32%.  Auðir og ógildir kjörseðlar voru 18.

Er þetta glæsileg kosning og mjög afgerandi.  Sr. Agnes verður þar með fyrst kvenna til að gegna embætti biskups á Íslandi.  Sr. Agnes verður vígð til biskups sunnudaginn 24. júní næstkomandi.  Hún tekur við embætti biskups 1. júlí 2012.

Hér með er boðað til héraðsfundar Vestfjarðaprófastsdæmis árið 2012. Fundurinn verður haldinn á Café Riis Hafnarbraut 39 Hólmavík sunnudaginn 15. apríl og hefst með helgistund í Hólmavíkurkirkju kl. 11.  Stefnt er að fundarlokum eigi síðar en kl. 17-17:30. 

Að helgistund lokinni  verður gengið til fundarstaðar þar sem setning fer fram og dagskrá skv. 5. gr. starfsreglna um héraðsfundi og héraðsnefndir nr. 965/2006 eftir því sem við á: 

1. Kosning fundarstjóra og fundarritara
2. Skýrsla héraðsnefndar um starfsemi liðins árs 

3. Ársreikningar héraðssjóðs til samþykktar
4. Fjárhagsáætlun héraðssjóðs fyrir næsta almanaksár til samþykktar og endurskoðuð fjárhagsáætlun fyrir 2012
5. Starfsskýrslur sókna (skriflegri skýrslu skilað)

6. Mál er varða Kirkjuþing, tekin til umfjöllunar og afgreiðslu

7. Samþykktir Prestastefnu og Leikmannastefnu kynntar og fréttir af fulltrúaráðsfundi HK
8. Ákvörðun um greiðslur til kjörinna héraðsnefndarmanna fyrir störf þeirra á liðnu ári
9. Kosningar:

a) kosning aðalmanns og varamanns til héraðsnefndar, prests, til tveggja ára

10. Þjóðkirkjufrumvarpið kynnt af 2 nefndarmönnum milliþinganefndar kirkjuþings. 

11. Önnur mál. 

Boðið er upp á rútuferðir á fundinn og eru þau sem það vilja þiggja beðin um að hafa samband við Berg Torfason héraðsnefndarmann varðandi það.  Síminn hjá Bergi er 894-6332 og netfangið btorfa@snerpa.is. 

Stefnt er að því að rúta fari frá Þingeyri kl. 7:30 og frá Ísafirði kl. 8:15.  Farþegar teknir upp í á leiðinni frá Þingeyri til Hólmavíkur.  FulltrúarVestur-Barðastrandasýslu, Reykhólaprestakalls og Hólmavíkurprestakalls hafi samband við Berg varðandi ferðamátann ef þarf.

Efst á þessari síðu við hliðina á ljósmyndinni eru tenglar á undirsíður.  Þar má til dæmis lesa fundargerð síðasta héraðsfundar.  Neðst er tengill á síðu þar sem skoða má sýnishorn af eyðublaðinu “Skýrsla sóknar til héraðsfundar Vestfjarðaprófassdæmis”.  Vinsamlegast sendið slíka skýrslu til prófasts fyrir 11. apríl á netfangið sr.agnes@simnet.is.

Á svæðinu frá Þingeyri til Bolungarvíkur skiptast prestarnir á að vera á bakvakt um kvöld, nætur og helgar. Þurfi fólk fyrirvaralítið að ná í prest á þessum tímum þá hringir það í númerið 856-1684 og þá svarar sá prestur, sem er á vaktinni.