Reykjavíkurprófastsdæmi vestra

Frá og með 1. september verða bænastundir í hádeginu alla virka daga í Hallgrímskirkju ætlaðar hverjum sem þiggja vill styrk og stuðning í þjáningu líðandi dags. Bænastundirnar hefjast kl. 12 og allir eru velkomnir til að syngja sálma og sameinast í bænarhug.

Nú er barna- og æskulýðsstarf að taka á sig vetrarmynd í kirkjum prófastsdæmisins. Foreldramorgnar hafa sumsstaðar verið starfandi í sumar og sögustundir fyrir börnin í sunnudagsmessum. Fermingarnámskeið hafa þegar verið haldin í nokkrum söfnuðum, en annars staðar fer skráning ungmennanna fram á næstu vikum. Kórastarf er í undirbúningi og sunnudagaskólinn hefst víða sunnudaginn 5. september. Kynnið ykkur starfið á heimasíðum safnaðanna.

Frábærir tónlistarmenn munu koma fram á tvennum tónleikum sem haldnir verða hér á Seltjarnarnesi í lok ágúst til ágóða fyrir Seltjarnarneskirkju.  Framundan er að mála þak kirkjunnar sem mun kosta á aðra milljón króna.  Munu tónlistarmennirnir gefa vinnu sína og fjáröflunin eiga sér stað með sölu aðgöngumiða 2000 kr á mann. Fyrri tónleikarnir eru 26. ágúst og þeir síðari 29. ágúst. Lesa áfram …

Sem undanfarin ár verður Sálmafoss í Hallgrímskirkju liður í menningarnótt Reykjavíkurborgar. Dagskráin stendur yfir frá kl. 14 til kl. 21 laugardaginn 21. ágúst og má finna nánari upplýsingar um þennan viðburð sem aðra á www.menningarnott.is.

Kórahátíðin Nordic-Baltic fer fram í Reykjavík dagana 17. - 21. ágúst 2010. Í Hallgrímskirkju koma fram átta kórar frá átta löndum og flytur hver kór eigin dagskrá. Í dag, 18. ágúst, munu kórarnir syngja í Hallgrímskirkju kl. 12.30 og svo aftur kl. 20.00.  Kórarnir munu vera í Hallgrímskirkju aftur næstkomandi föstudag og á Menningarnótt, sem er á laugardaginn kemur. Framkvæmdastjóri kórahátíðarinnar er Margrét Bóasdóttir sópransöngkona og kórstjórnandi. Sjá nánar á http://choral.iii.is/

Helgina 14. og 15. ágúst eru lokatónleikar Alþjóðlegs orgelsumars að þessu sinni, en minnt er á hádegistónleika Schola Cantorum sem verða áfram á miðvikudögum í ágúst. Á þessari síðustu orgeltónleikatvennu leikur einn fremsti orgelleikari Norðmanna, Halgeir Schiager. Tónleikarnir á laugardeginum eru kl. 12 og á sunnudeginum kl. 17.

Opið hús á vegum Nýrrar dögunar, samtaka um sorg og sorgarviðbrögð, verður í safnaðarheimili Háteigskirkju fimmtudagskvöldið 12. ágúst kl. 20. Þar getur fólk komið saman, spjallað, miðlað sinni reynslu, eða hlustað  og fengið sér kaffi. Venjulega er byrjað með stuttu innleggi en svo er samveran í höndum þeirra sem koma en þó er enginn tilknúinn til að tjá sig. Samtalið er bundið trúnaði. Lesa áfram …

Á síðustu hádegistónleikum FÍO og Listvinafélags Hallgrímskirkju leikur Ágúst Ingi Ágústsson á Klais-orgelið í Hallgrímskirkju. Tónleikarnir eru fimmtudaginn 12. ágúst og hefjast kl. 12. Hádegistónleikar Schola Cantorum á miðvikudögum kl. 12 halda áfram út ágúst.

Í tveimur kirkjum prófastsdæmisins hefur í mörg sumur verið boðið upp á leikjanámskeið fyrir börn á aldrinum 6-10 ára. Síðastu námskeið sumarsins hefjast mánudaginn 9. ágúst. Nánari upplýsingar er að finna á www.itr.is, www.neskirkja.is og www.seltjarnarneskirkja.is.

Nýráðinn dómorgansti í Reykjavík, Kári Þormar, spilar á tónleikum í Hallgrímskirkju laugardaginn 7. ágúst kl. 12 og sunnudaginn 8. ágúst kl. 17. Um fjölbreytta efnisskrá Kára má lesa á www.listvinafelag.is.