Sr. Ingþór Indriðason, pastor emeritus, kvaddur

10. júlí 2019

Sr. Ingþór Indriðason, pastor emeritus, kvaddur

Sr. Ingþór Indriðason

Sr. Ingþór Indriðason Ísfeld fæddist á Akureyri 26. september 1935 og lést 8. júlí í Winnipeg. Foreldrar hans voru þau Indriði Ísfeld, bifreiðastjóri og iðnverkamaður, og Bjarnheiður Ingþórsdóttir, hjúkrunarfræðingur. Eiginkona sr. Ingþórs er Guðmunda Gunnur Guðmundsdóttir, ritstjóri Lögbergs-Heimskringlu. Eignuðust þau fjögur börn: Þóru Gunnu, Stefán, Heiðu Björgu og Hörpu Kolbrúnu. 

Sr. Ingþór lauk stúdentsprófi frá Menntaskólanum í Reykjavík 1955 og guðfræðiprófi frá Háskóla Íslands 1959.

Sr. Ingþór var vígður 22. júní 1959. Hann var fyrsti guðfræðingurinn sem sr. Sigurbjörn Einarsson, biskup, vígði.

Það var Herðubreiðarsöfnuður í Langruth í Manitoba í Kanada sem fyrst fékk að njóta þjónustu sr. Ingþórs og síðar lútherskur söfnuður Íslendinga í Vancouver í Britsh Columbia. Hann var ráðinn farprestur þjóðkirkjunnar 1965 og jafnframt settur til að þjóna Ólafsfjarðarprestakalli, og síðar Hveragerðisprestakalli um tíma. Hann fór aftur utan til Kanada og þá til þjónustu við Gimlisöfnuð í Manitoba og síðar við lútherskan söfnuð í Winnipeg. Hann fékkst við kennslustörf í prestaköllum sem hann þjónaði og þá vann hann við fasteignasölu í Winnipeg í rúman áratug.

Sr. Ingþór var einn af stofnendum KFUM á Akureyri og sat í stjórn samtakanna sem og í stjórn Kristilegra skólasamtaka, Kristilegs stúdentafélags og um skeið í stjórn Hins íslenska Biblíufélags. Hann var kallaður til stjórnarstarfa í mörgum nefndum og stjórnum á vettvangi kirkjumála í Kanada.

Sr. Ingþór var ljúfur maður í allri viðkynningu, traustur og trúr í hverju verki sem hann tók sér fyrir hendur. Hann var vel ritfær maður og sat í ritstjórnum tímarita, þýddi bækur og frá hendi hans kom t.d. lítið kver og læsilegt: Biblían og nútíminn, árið 1970.

Sr. Ingþór Indriðason er kvaddur með virðingu og þökk. Guð blessi minningu hans.


  • Frétt

  • Samfélag

  • Samfélag

Sölvi Hilmarsson og Eva Björk Kristborgardóttir standa vaktina
20
júl.

Þau standa vaktina

...villtur lax úr Hvítá og nýjar íslenskar kartöflur...
Dr. Munib Younan og sr. Kristján Björnsson, vígslubiskup
19
júl.

Málþing á morgun í Skálholti

...að leysa ágreining, koma á friði og vinna að sáttargjörð
Hellnakirkja - listsýning og viðgerð
19
júl.

Þegar kirkja gliðnar

...enginn sannkristinn maður vill að guðshúsið hlaupi út undan grunni sínum og í sjó fram.