Sálmar

Sálmur 1

  • Sé Drottni lof og dýrð,
  • hans dásemd öllum skýrð,
  • hann lofi englar allir
  • og æðstu ljóssins hallir,
  • hann lofi hnatta hjólin
  • og heiðri tungl og sólin.
  • Hann lofi líf og hel
  • og loftsins bjarta hvel,
  • hann lofi lögmál tíða,
  • sem ljúft hans boði hlýða
  • og sýna veldis vottinn,
  • ó, veröld, lofa Drottin.
  • Hver þjóð um lög og láð,
  • ó, lofið Drottins náð,
  • þér glöðu, hraustu, háu,
  • þér hrelldu, veiku, lágu,
  • þér öldnu með þeim ungu,
  • upp, upp með lof á tungu.
  • Með öllum heimsins her
  • þig, Herra, lofum vér
  • af innsta ástar grunni
  • með öndu, raust og munni.
  • Vort hjarta bljúgt sig hneigir
  • og hallelúja segir.
Sl 148. - Sb. 1671 - Jón Þorsteinsson
Matthías Jochumsson

Sálmur 2

  • Lof sé þér um ár og öld,
  • mikli Drottinn dýrðarinnar,
  • dýrðar vil ég minnast þinnar,
  • þér sé vegsemd þúsundföld.
  • Kynslóð eftir kynslóð lofar
  • kærleik þinn og speki' og mátt,
  • þú, sem ríkir öllu ofar,
  • allt þú blessar, stórt og smátt.
  • Miskunnsamur mjög þú ert,
  • ó, hve þú, minn Guð, ert góður,
  • gæskuríkur, þolinmóður,
  • öll þín verk það vitna bert.
  • Öll þín verk þitt veldi róma,
  • vegsama þitt dýrðarráð,
  • öll þín verk þó einkum hljóma
  • um þinn kærleik, líkn og náð.
  • Allra vona augu' á þig,
  • þú upp hendi þinni lýkur,
  • þú ert ætíð nógu ríkur
  • alla' að blessa' og einnig mig.
  • Öllum þeim, sem á þig kalla,
  • allt þú lætur gott í té,
  • frelsar þú og annast alla,
  • eilíft lof og dýrð þér sé.
Sl 145 - Sb. 1886 - Valdimar Briem

Sálmur 3

  • Lofið vorn Drottin,
  • hinn líknsama föður á hæðum,
  • lofið hann allir
  • með söngvum og vegsemdar ræðum,
  • lofi hann sál,
  • lofi hann athöfn og mál,
  • gnótt hann oss veitir af gæðum.
  • Lofið vorn Drottin,
  • hann leiðir og verndar og styður,
  • leysir úr nauðum
  • og heyrir þess andvörp, er biður,
  • byggðir um lands
  • blessaðar ástgjafir hans
  • drjúpa sem dögg til vor niður.
  • Lofið vorn Drottin,
  • hann ávaxtar iðninnar sveita,
  • atvinnu synjar ei
  • þeim, er sér bjargræðis leita,
  • farsæld og frið
  • fulltingi, hjástoð og lið
  • öllum oss virðist hann veita.
  • Lofið vorn Drottin,
  • er englanna hersveitir hlýða,
  • hans eftir skipunum
  • stormar og eldingar bíða,
  • dýrð honum ber,
  • himinninn hástóll hans er,
  • jörðin hans fótskörin fríða.
  • Lofið vorn Drottin,
  • og takið með englum hans undir,
  • allir hann vegsamið
  • lífs yðar gjörvallar stundir,
  • hátt göfgið hann,
  • Herrann vorn Guð, sem oss ann,
  • allar hann lofið á lundir.
Sl 103 - Neander - Sb. 1801 - Helgi Hálfdánarson

Sálmur 4

  • Dýrð í hæstum hæðum,
  • himna Guð, þér syngja
  • allir þínir englar og öll þín hólpin hjörð.
  • Jörð það endurómar,
  • allar klukkur hringja,
  • fagnandi hjörtu færa þakkargjörð.
  • Dýrð í hæstum hæðum.
  • Helgir leyndardómar
  • opnast fyrir augum
  • þess anda', er ljós þitt sér.
  • Allt, sem anda dregur, elsku þína rómar,
  • tilveran gjörvöll teygar líf frá þér.
  • Dýrð í hæstum hæðum.
  • Hingað oss þú sendir
  • soninn þinn að sýkna hinn seka lýð á jörð.
  • Síðan hátt til himna
  • hann með krossi bendir,
  • sigur hann gefur sinni barnahjörð.
  • Dýrð í hæstum hæðum,
  • hljómar þér um aldir,
  • þyrnikrýndur, krossi píndur
  • kóngur lífs og hels.
  • Lýtur þér og lofar lýður, sem þú valdir,
  • lýsandi' á jörð sem ljómi fagrahvels.
  • Dýrð í hæstum hæðum. Heilagri þrenning,
  • föður, syni' og friðaranda,
  • færum lofgjörð vér,
  • göfgi þig með gleði
  • gjörvöll jarðarmenning,
  • Guð einn og þrennur, þökk þér einum ber.
Heber - Sb. 1945 - Friðrik Friðriksson

Sálmur 5

  • Drottinn, vor konungur,
  • dýrlegt er nafn þitt hið blíða,
  • dýrlegt og vegsamlegt
  • heims meðal gjörvallra lýða.
  • Drottinn, þín hjörð
  • dýrkar þitt nafn hér á jörð
  • eins og um alheiminn víða.
  • Lofgjörð þú bjóst þér hjá
  • börnunum saklausu' og ungu,
  • brjóstmylkingunum þú
  • jafnvel knýr vegsemd af tungu.
  • Þögnuðu þeir,
  • þá mundu flytja því meir
  • boðskap þann björgin hin þungu.
  • Líti' eg til himinsins,
  • handaverk þín er ég skoða,
  • herskara stjarnanna,
  • tign þína' og almátt er boða,
  • undrar mig á,
  • ást þín og náð hvað er há,
  • oss er þú einnig vilt stoða.
  • Hvað eru dauðlegir
  • menn, að þú minnst þeirra getur,
  • mannanna börn, að þú
  • vegsemdar slíkrar þau metur?
  • Manninn á jörð
  • máttugri englanna hjörð
  • lítið eitt lægra þú setur.
  • Handaverk sjálfs þín
  • þú honum til umráða gefur,
  • hamingju, blessun og
  • sæld hann þú krýnir og vefur,
  • Drottinn, þitt nafn
  • dýrki þitt herskara safn,
  • allt það, sem andardrátt hefur.
Sl 8 - Sb. 1886 - Valdimar Briem

Sálmur 6

  • Drottinn, ó, Drottinn vor,
  • dagarnir líða,
  • allt er að breytast, en aldrei þú.
  • Ver þú oss veikum hjá,
  • vernda þína arfleifð.
  • Líknandi hendi, ó, leið oss nú.
  • Drottinn, ó, Drottinn vor,
  • drag oss æ nær þér,
  • lífið hið eina' er hjá einum þér.
  • Þar veitir þú oss frið,
  • þróttinn til að lifa,
  • sigurvon eilífa eignumst vér.
  • Drottinn, ó, Drottinn vor,
  • dýrð þína að efla,
  • göfga þig einan æ gef oss náð,
  • vinna þitt verk á jörð,
  • vera þér til dýrðar,
  • vegsama nafn þitt um lög og láð.
Níels Steingrímur Thorláksson

Sálmur 7

  • Ó, hvað þú, Guð, ert góður,
  • þín gæska' og miskunn aldrei dvín.
  • Frá lífi minnar móður
  • var mér æ nálæg aðstoð þín.
  • Mig ávallt annast hefur
  • og allt mitt blessað ráð,
  • og mér allt gott æ gefur,
  • ó, Guð, þín föðurnáð.
  • Það mér úr minni' ei líði,
  • svo mikli' eg nafnið þitt
  • og þér af hjarta hlýði,
  • þú hjartans athvarf mitt.
Sb. 1871 - Páll Jónsson

Sálmur 8

  • Tunga mín, vertu treg ei á
  • að tjá, hvað Guð mér veitti.
  • Hjartað mitt, einnig herm þú frá,
  • hversu hann við þig breytti.
  • Drottinn minn Guð, þig dýrka ég,
  • dásamur ertu næsta,
  • síst skal því vera sál mín treg
  • að syngja þér lofgjörð hæsta.
Sb. 1772 - Höfundur ókunnur

Sálmur 9

  • Lofsyngið Drottni, lýðir tignið hann.
  • Hefjið gleðihljóma, heiðrið skaparann.
  • Miskunn hans er mikil, máttarverkin stór.
  • Lofi, lofi Drottin loft og jörð og sjór.
  • Lofsyngi Drottni ljóssins bjarti her.
  • Óminn ber að ofan, undir tökum vér.
Valdimar V. Snævarr

Sálmur 10

  • Vort traust er allt á einum þér,
  • vor ástarfaðir mildi.
  • Þín náð og miskunn eilíf er,
  • það alla hugga skyldi.
  • Þú ert vor stoð og einkahlíf,
  • svo engu þurfum kvíða,
  • vor huggun, athvarf, ljós og líf.
  • Æ, ljúft er því að stríða.
  • Í hverju, sem að höndum ber,
  • og hvað sem bágt oss mætir,
  • þín hjálp oss nálæg ætíð er
  • og allar raunir bætir.
  • Þín forsjón vakir yfir oss,
  • þín alvöld hönd oss leiðir,
  • þú linar böl og léttir kross
  • og lífsins meinum eyðir.
  • Þú græðir hjartans sviðasár,
  • þú syndir fyrirgefur,
  • þú stöðvar öll vor angurstár,
  • þú alla náð umvefur.
  • Þín föðurnáð, æ fersk og ný,
  • oss föðurgæðum seður
  • og lífsins kjörum öllum í
  • oss annast, blessar, gleður.
  • Vort traust er allt á einum þér,
  • því allt þú gott oss veitir.
  • Þín náð og miskunn eilíf er,
  • þú öllu' í sigur breytir.
Sb. 1871 - Páll Jónsson

Sálmur 11

  • Drottinn Guð, þitt dýra nafnið skæra
  • dýrka ber og veita lotning tæra.
  • Hver tunga, vera
  • skal vitni bera,
  • að voldug eru
  • þín ráð og þér þakkir færa.
  • Guð er Guð, þótt veröld væri eigi,
  • verður Guð, þótt allt á jörðu deyi.
  • Þótt farist heimur
  • sem hjóm og eimur,
  • mun heilagt streyma
  • nýtt líf um geim, Guðs á degi.
  • Björgin hrynja, hamravirkin svíkja,
  • himinn, jörð og stjörnur munu víkja,
  • en upp mun rísa,
  • og ráð hans prísa,
  • hans ríki vísa
  • og ljósið lýsa og ríkja.
Dass - Sigurbjörn Einarsson

Sálmur 12

  • Upp, skepna hver, og göfga glöð
  • vorn Guð með þakkarfórn,
  • af ástarverkum eilíf röð
  • :,: er öll hans voldug stjórn. :,:
  • Ó, lofið mesta meistarann,
  • þér menn, á hverri tíð,
  • því mikla gjörir hluti hann
  • :,: um heiminn ár og síð. :,:
  • Oss öllum líf og afl og brauð
  • hann óverðskuldað gaf,
  • í líkn á vora leit hann nauð
  • :,: og létti byrðum af. :,:
  • Vor sól og skjöldur æ hann er,
  • vort athvarf, traust og hlíf,
  • vort ljós í dalnum dimma hér,
  • :,: í dauðanum vort líf. :,:
  • Hann opnar helgan himin sinn,
  • er heims er lokið vist,
  • og sínum þangað safnar inn
  • :,: í samfélag við Krist. :,:
  • Ó, lofum allir, lofum hann,
  • hann lofi rödd og mál,
  • hann lofi allt, er lofa kann,
  • :,: hann lofi hjarta' og sál. :,:
Gerhardt - Sb. 1886 - Helgi Hálfdánarson