21. sunnudagur eftir þrenningarhátíð

Drottinn Guð, við biðjum þig: Varðveit söfnuð þinn með stöðugri föðurelsku að hann megi í skjóli þínu vera óhultur fyrir öllum háska og vegsama með verkum sínum þitt heilaga nafn. Fyrir son þinn Jesú Krist, Drottin vorn sem með þér lifir og ríkir í einingu heilags anda, einn sannur Guð um aldir alda.

Sá er situr í skjóli Hins hæsta og dvelst í skugga Hins almáttka segir við Drottin: „Hæli mitt og háborg, Guð minn, er ég trúi á.“ Hann frelsar þig úr snöru fuglarans, frá drepsótt eyðingarinnar, hann skýlir þér með fjöðrum sínum, undir vængjum hans mátt þú hælis leita, trúfesti hans er skjöldur og vígi.

Ég gróðursetti, Apollós vökvaði en Guð gaf vöxtinn. Þannig skiptir það engu hver gróðursetur eða hver vökvar. Það er Guð sem skiptir máli, hann gefur vöxtinn. Sá sem gróðursetur og sá sem vökvar eru eitt. En sérhver mun fá laun eftir erfiði sínu. Því að samverkamenn Guðs erum við, Guðs akurlendi, Guðs hús eruð þið.

Jesús sagði við þá: „Minn matur er að gera vilja þess sem sendi mig og fullna verk hans. Segið þið ekki: Enn eru fjórir mánuðir, þá kemur uppskeran? En ég segi ykkur: Lítið upp og horfið á akrana, þeir eru fullþroskaðir til uppskeru. Sá sem upp sker tekur þegar laun og safnar ávexti til eilífs lífs. Þá getur sá sem sáir samfagnað þeim sem upp sker. Hér sannast orðtakið: Einn sáir og annar upp sker. Ég sendi ykkur að skera upp það sem þið hafið ekki unnið við. Aðrir hafa erfiðað en þið njótið erfiðis þeirra.“

1 Ó, Drottinn Kristur, dýrleg, rík og há skín dáð og mynd þíns lífs um aldaslóð. Vor dauðleg augu endurskinið sjá og aðeins brot af þinni sólarglóð. 2 Lát nýja hugsun nema vilja þinn og ná að túlka rétt þitt helga mál og nýjar tungur tjá þér fögnuð sinn er tindra ljósin þín í hug og sál. 3 Lát nýja kynslóð flytja Faðir vor og fjærstu lýði þína birtu sjá, þitt frelsi, þína fórn og heilög spor og finna líf sem grær þér einum hjá. 4 Þú ert um eilífð nýr og samur samt. Lát safnast alla menn í þína hjörð því einn þú hefur alla frelsað jafnt og átt hvert barn á þinni víðu jörð. Sigrid Dahlquist – Sigurbjörn Einarsson