6. sunnudagur eftir þrenningarhátíð

Almáttugi, eilífi Guð sem gefur allt hið góða: Gróðurset í hjörtu okkar kærleik til þíns heilaga nafns .Veit okkur vöxt í trúnni svo að þú megir í okkur efla allt gott og varðveita af föðurelsku þinni það sem þú lífgar og styrkir. Fyrir son þinn Jesú Krist, Drottin vorn, sem með þér lifir og ríkir í einingu heilags anda, einn sannur Guð um aldir alda.

Svo segir Drottinn Guð sem skapaði himininn og þandi hann út, sem breiddi út jörðina með öllu sem á henni vex, sá er andardrátt gaf jarðarbúum og lífsanda þeim sem á jörðinni ganga: Ég, Drottinn, kallaði þig í réttlæti og held í hönd þína. Ég móta þig, geri þig að sáttmála fyrir þjóðirnar og að ljósi fyrir lýðina til að opna hin blindu augu, leiða fanga úr varðhaldi og úr dýflissu þá sem í myrkri sitja.

Með því að trúa á Krist Jesú eruð þið öll Guðs börn. Þið öll, sem eruð skírð til samfélags við Krist, hafið íklæðst Kristi. Hér er hvorki Gyðingur né annarrar þjóðar maður, þræll né frjáls maður, karl né kona. Þið eruð öll eitt í Kristi Jesú. Ef þið eruð í samfélagi við Krist þá eruð þið niðjar Abrahams og erfið það sem honum var heitið.

Ætlið ekki að ég sé kominn til að afnema lögmálið eða spámennina. Ég kom ekki til að afnema heldur uppfylla. Sannlega segi ég yður: Þar til himinn og jörð líða undir lok mun ekki einn smástafur eða stafkrókur falla úr lögmálinu uns allt er komið fram. Hver sem því brýtur eitt af þessum minnstu boðum og kennir öðrum það mun kallast minnstur í himnaríki en sá sem heldur þau og kennir mun mikill kallast í himnaríki.

1 Ég grundvöll á sem get ég treyst því Guð minn lagt hann hefur af elsku' og náð sem ei fær breyst og óverðskuldað gefur. Að boði hans ég borinn var að bjartri laug og skírður þar af orði hans og anda. 2 Á höfuð mitt og hjarta var hans helgi kross þá ristur sem augljóst tákn þess að mig þar til eignar tæki Kristur því keypt hann hefði' á krossi mig og knýtt með þeirri fórn við sig og nú á ný mig fæddi. 3 Hve gott að eiga grundvöll þann þá guðlaus vantrú hræðir að sjálfur Drottinn verkið vann sem veikan endurfæðir. Ég, allslaust barn, gat ekki neitt en eilíft líf af náð var veitt, mitt nafn í lífsbók letrað. Bjarni Eyjólfsson