Boðunardagur Maríu

Drottinn Guð, við biðjum þig: Vitja okkar í náð og gef að við sem samkvæmt boðun engilsins vitum að eilífur sonur þinn fæddist af Maríu meyju megum sakir krossferils hans fæðast til himneskrar dýrðar upprisu hans sem með þér lifir og ríkir í einingu heilags anda, einn sannur Guð um aldir alda.

Hanna bað og sagði: Hjarta mitt fagnar í Drottni. Horn mitt er upphafið af Drottni. Ég hlæ að fjandmönnum mínum því að ég gleðst yfir hjálp þinni. Enginn er heilagur sem Drottinn, enginn er til nema þú, enginn er klettur sem Guð vor. Hreykið yður ekki í orðum, sleppið engum stóryrðum af vörum því að Drottinn er vitur Guð, hann metur verkin. Bogi kappanna er brotinn en örmagna menn gyrðast styrkleika. Saddir selja sig fyrir brauð en hungraðir þurfa þess ekki. Óbyrja elur sjö börn en barnmörg móðir visnar. Drottinn deyðir og lífgar, sendir menn til heljar og leiðir þá upp þaðan. Drottinn sviptir menn eigum og auðgar þá, hann niðurlægir og upphefur. Hann lyftir hinum auma úr duftinu og hefur hinn snauða úr skarninu, leiðir hann til sætis hjá höfðingjum og skipar honum í öndvegi. Stoðir jarðar eru eign Drottins, á þeim reisti hann heiminn. Hann ver fætur sinna réttlátu en ranglátir þagna í myrkrinu því að enginn er máttugur af eigin afli. Drottinn kremur þá sem rísa gegn honum, Hinn hæsti sendir þrumur af himni gegn þeim. Drottinn dæmir alla jörðina. Hann eflir konung sinn að mætti og hefur upp horn síns smurða.

Nú er því engin fyrirdæming búin þeim sem eru í Kristi Jesú. Því að lögmál þess anda sem lífið gefur í Kristi Jesú hefur frelsað mig[ frá lögmáli syndarinnar og dauðans. Það sem lögmálinu var ógerlegt, þar eð það var vanmegna gagnvart sjálfshyggju[ mannsins, það gerði Guð með því að senda sinn eigin son í líkingu syndugs manns gegn syndinni og dæma syndina í manninum. Þar með gat réttlætiskröfu lögmálsins orðið fullnægt hjá okkur sem andinn fær að leiða en ekki sjálfshyggjan

Og María sagði: Önd mín miklar Drottin og andi minn gleðst í Guði, frelsara mínum. Því að hann hefur litið til ambáttar sinnar í smæð hennar, héðan af munu allar kynslóðir mig sæla segja. Því að mikla hluti hefur Hinn voldugi við mig gert og heilagt er nafn hans. Miskunn hans við þá er óttast hann varir frá kyni til kyns. Máttarverk hefur hann unnið með armi sínum og drembilátum í hug og hjarta hefur hann tvístrað. Valdhöfum hefur hann steypt af stóli og upp hafið smælingja, hungraða hefur hann fyllt gæðum en látið ríka tómhenta frá sér fara. Hann hefur minnst miskunnar sinnar og tekið að sér Ísrael, þjón sinn, eins og hann hét feðrum vorum, Abraham og niðjum hans, eilíflega. En María dvaldist hjá henni hér um bil þrjá mánuði og sneri síðan heim til sín

1 Guðs engill birtist ungri stúlku hjá, með yndislegan boðskap himnum frá. Og sagði: „Heil vert þú, er finnur náð hjá Guði.“ Þú, mætust allra meyja, María! 2 „Í fylling tímans fæðast mun þér son, er flytur myrkum heimi trú og von. Og græðir lífsins sár með kærleiks vörmu hjarta.“ Þú, mætust allra meyja, María! 3 Og hér barst röddin hlý og mildileg: „Sem Herrann æskir, fús það geri ég.“ Við orðin ljúfu Gabríel þá hvarf á brautu. Þú, mætust allra meyja, María! 4 Og blítt svo fæddist barn: Emmanúel. Í Betlehem upp lýstist næturþel. Enn minnist þess um heimsbyggð alla kristinn lýður. Þú, mætust allra meyja, María! Jólakvæði frá Baskalandi – Sabine Baring-Gould – Sigurður Ægisson Upprunalegur texti (ekki eins og í Sálmabók 2022, 1. útg., sem fór inn vegna mistaka)