Þrenningarhátíð

Almáttugi, eilífi Guð sem hefur gefið þjónum þínum að játa sanna trú og þekkja þannig dýrð eilífrar þrenningar og tilbiðja einingu hátignar þinnar: Við biðjum þig að gera okkur staðföst í þessari trú og varðveita okkur gegn öllu böli. Fyrir son þinn Jesú Krist, Drottin vorn, sem með þér lifir og ríkir í einingu heilags anda, einn sannur Guð um aldir alda.

Abraham sat í tjalddyrum sínum í miðdegishitanum í Mamrelundi er Drottinn birtist honum. Honum varð litið upp og stóðu þá þrír menn frammi fyrir honum. Er hann sá þá hljóp hann til móts við þá úr tjalddyrunum, laut til jarðar og mælti: „Herra minn, hafi ég fundið náð fyrir augum þínum þá gakk ekki fram hjá þjóni þínum. Mættum við sækja svolítið vatn að þið getið þvegið fætur ykkar og hvílst undir trénu? Ég ætla að ná í matarbita svo að þið getið styrkt ykkur áður en þið haldið lengra úr því að þið fóruð um hjá þjóni ykkar.“ Þeir svöruðu: „Gott og vel, gerðu eins og þú hefur sagt.“

Að öðru leyti, bræður mínir og systur,[ verið glöð. Verið fullkomin, áminnið hvert annað, verið samhuga, lifið saman í friði. Þá mun Guð kærleikans og friðarins vera með ykkur. Heilsið hvert öðru með heilögum kossi. Allir heilagir biðja að heilsa ykkur. Náðin Drottins Jesú Krists, kærleiki Guðs og samfélag heilags anda sé með yður öllum.

Á þeim tíma tók Jesús svo til orða: „Ég vegsama þig, faðir, Drottinn himins og jarðar, að þú hefur hulið þetta spekingum og hyggindamönnum en opinberað það smælingjum. Já, faðir, svo var þér þóknanlegt. Allt hefur faðir minn falið mér og enginn þekkir soninn nema faðirinn, né þekkir nokkur föðurinn nema sonurinn og sá er sonurinn vill opinbera hann.

1 Nú ljómar dýrðardagur, hin dimma nótt er liðin hjá og friðarbogi fagur Guðs föðurhimni blikar á. Um dauðans dimmar álfur nú dýrðleg birta skín, Guðs sonur, Jesús sjálfur, er sól og unun mín. Nú leynist enginn lengur á lausnara síns fund en frjáls og glaður gengur til Guðs á helgri stund. 2 Það líður vindblær léttur um loft og haf og dal og sveit. En hvaðan hann upp sprettur og hvert hann fer, það enginn veit. Svo er Guðs andi hulinn er í býr hjarta manns. Hans vegur víst er dulinn, þó verkar kraftur hans. Sá guðdómsandinn glæði minn guðdóms myndar vott og í mér endurfæði allt indælt, satt og gott. Valdimar Briem