2. sunnudagur í níuviknaföstu – Biblíudagurinn

Kollekta: Drottinn Jesús Kristur, þú sem ert orð lífsins. Þú gjörðist hold á jörðu og kunngjörðir okkur leyndardóma Guðs ríkis: Gef okkur náð til að trúa með fögnuði og treysta því, sem Heilög ritning boðar okkur til hjálpræðis, því að þú lifir og ríkir með Guði föður í einingu heilags anda, einn sannur Guð um aldir alda.

Einhver segir: „Kalla þú,“ og ég spyr: „Hvað á ég að kalla?“ „Allt hold er gras og allur yndisleikur þess sem blóm vallarins. Grasið visnar, blómin fölna þegar Drottinn andar á þau. Sannlega eru mennirnir gras. Grasið visnar, blómin fölna en orð Guðs vors varir að eilífu.“

Því að orð Guðs er lifandi og kröftugt og beittara hverju tvíeggjuðu sverði og smýgur inn í innstu fylgsni sálar og anda, liðamóta og mergjar, það dæmir hugsanir og hugrenningar hjartans. Enginn skapaður hlutur er Guði hulinn, allt er bert og öndvert augum hans. Honum eigum við reikningsskil að gera.

Þá sagði Jesús: „Svo er Guðs ríki sem maður sái sæði í jörð. Hann sefur síðan og vakir, nætur og daga, en sæðið grær og vex, hann veit ekki með hverjum hætti. Sjálfkrafa ber jörðin ávöxt, fyrst stráið, þá axið og síðan fullvaxið hveiti í axinu. En þá er ávöxturinn er fullþroska lætur hann þegar bera út sigðina því að uppskeran er komin.“ Og Jesús sagði: „Við hvað eigum við að líkja Guðs ríki? Með hvaða dæmi eigum við að lýsa því? Líkt er það mustarðskorni. Þegar því er sáð í mold er það smærra hverju sáðkorni á jörðu. En eftir að því er sáð tekur það að spretta, það verður öllum jurtum meira og fær svo stórar greinar að fuglar himins geta hreiðrað sig í skugga þess.“

1 Þitt heilagt himinsáð um heimsins akur stráð, það ljóss og lífs orð góða sem líf og heill er þjóða á erfitt upp að spretta hjá illgresinu þétta. 2 Ó, Guð, hve grátlegt er á góðu lítið ber en illt er oft hvað tíðast, á akri kirkju víðast nú þyrnar þéttir standa og þínu hveiti granda. 3 Ó, gef það, Guð, af náð að guðlegt orðasáð er sífellt sá þú lætur í sálum festi rætur. Lát ávöxt af því spretta til eilífs lífs, hinn rétta. Nikolaj F.S. Grundtvig – Helgi Hálfdánarson