Prestsbakkakirkja í Hrútafirði

Prestsbakkakirkja í Hrútafirðivar vígð árið 1957. Hún er steinsteypt hús með timburgólfi og járnklæddu timburþaki. Kórstúka er við austurgafl og forkirkja með anddyri undir turni sem er áfastur vesturstafni. Veggir eru einangraðir með korki, hvelfing er múrhúðuð að innan á trétexklæðningu. Kirkjan rúmar um 170 í sæti. Yfirsmiður kirkjunnar var Ísak Árnason á Sauðárkróki og gerði hann einnig prédikunarstólinn, altari, grátur og bekki.

Altaristaflan var máluð árið 1925 af Sæmundi Skarphéðinssyni á Kollsá, eftir öðru málverki og sýnir Krist í Emmaus. Umgjörð smíðaði Daníel Tómasson, smiður á Kollsá árið 1927. Kirkjan á kaleik úr silfri með áletrun: In memoriam beati Lutherii ecclesia Prestbakkensis. Patína úr silfri fylgir kaleiknum. Kirkjuklukkur Prestsbakkakirkju eru tvær.