Mjóafjarðarkirkja

Mjóafjarðarkirkja var byggð árið 1892. Yfirsmiður var Ólafur Ásgeirsson frá Loðmundarfirði, seinna á Norðfirði. Kirkjan stendur neðarlega á Borgareyrartúni í Brekkuþorpi og ber hana yfir önnur hús. Kirkjugarðurinn liggur að kirkjunni á tvo vegu og er þar steinsteypt grafhýsi ofan jarðar.

Mjóafjarðarkirkja er timburhús með bárujárnsþaki, klæðning á útveggjum var járnvarin árið 1909. Inni er söngloft og er loft kirkjunnar bogamynduð hvelfing. Grunnur kirkjunnar er hlaðinn úr völdu grjóti, ótilhöggnu, einnig garður umhverfis kirkjugarðinn

Í kirkjunni eru sæti fyrir rösklega 100 manns. Forn koparklukka er í kirkjunni, fornir kertastjakar eru á altari og altaristafla frá 1872. Fagurt málverk er í kirkjunni, gert árið 1871 af W.Holm í Kaupmannahöfn.