Langamýri?

19. júní 2019

Langamýri?

Starfsfólk Löngumýri

Þið vitið eflaust mörg að þar eru starfræktar sumarbúðir fyrir eldri borgara, en ég djáknanemi og hjúkrunarfræðingur þekkti ekki til staðarins og því ekki með neinar væntingar þegar ferðin hófst.

Það tók hinsvegar ekki marga klukkustundir að heillast algjörlega af þeim frábæra anda og flotta starfi sem þar er unnið.

Þórey djákni og starfsfólkið frá Löngumýri með Sigvalda og Gunnar í fararbroddi á hrós skilið fyrir vel skipulagða dagskrá og gestrisni. Þema þessa árs er í kúlu Krists og það voru eldri borgararnir svo sannarlega. Kærleikur og vinátta var umlykjandi og allt gert til að gera dvölina eins ánægjulega og kostur var.

Líkt og kemur fram hér að ofan starfa ég sem hjúkrunarfræðingur og vinn í heimahjúkrun. Mér stóð til boða að taka þátt í þessu sem hluti af starfsþjálfun djáknanema á vegum þjóðkirkjunnar. Það sem mér þótti merkilegast var hve heildræn nálgun var í öllu verki. Inn í dagskrá dagsins var fléttað öllum þáttum sem eru mikilvægir til að viðhalda reisn og draga úr neikvæðum þáttum öldrunar. Þar er lögð áhersla á næringu, hvíld, hreyfingu, vitræna örvun, andlega uppörvun, fræðslu, daglegar helgistundir, skemmtanir og ferðir. Allt þetta miðar að því að efla einstaklinginn og gefa honum verkfæri til að taka með sér heim. Það mikilvægasta er tengslamyndunin bæði við sjálfan sig, Guð og menn og samræmist það einnig kenningum sálgæslunnar.

Tilfinningin eftir þessa 6 daga dvöl er stolt. Ég er stolt af kirkjunni minni að bjóða upp á slíkt lýðheilsuverkefni og ég er stolt af því að njóta leiðsagnar Þóreyjar djákna og starfsfólksins á Löngumýri sem er að gera stórkostlega hluti.

Það er von mín að verkefni sem þetta eigi eftir að eflast enn frekar enda eitt af fallegri verkefnum þjóðkirkjunnar. Að mínu mati á þetta að vera órjúfanlegur partur af möguleikum sem eldri borgurum stendur til boða.

Guðbjörg Hulda Einarsdóttir

  • Frétt

  • Kærleiksþjónusta

  • Öldrunarþjónusta

  • Samfélag

  • Samfélag

Tímamót - Margrét Bóasdóttir og Pétur Garðarsson
15
nóv.

Hurð fellur að stöfum

...tímarnir breytast og mennirnir með
Bók og kaffi, hvort tveggja nauðsynlegt
14
nóv.

Áttaviti fræðanna

Umfjöllunin er hógvær og öfgalaus
Fætur kirkjuorganistans
14
nóv.

Tónmenntasjóður kirkjunnar

Umsóknarfrestur er til 24. nóvember