Olía á striga prestsins

17. febrúar 2020

Olía á striga prestsins

Sr. Sighvatur Karlsson við tvö verka sinna

Sr. Sighvatur Karlsson sýnir nú tíu olíumálverk á striga í Seltjarnarneskirkju. Sýningin hófst í gær eftir að guðsþjónustu lauk þar sem sr. Sighvatur prédikaði. Hann þjónar nú sem héraðsprestur í Reykjavíkurprófastsdæmi eystra en hefur verið sóknarprestur á Húsavík.

Ólafur Egilsson, formaður Listvinafélgs Seltjarnarneskirkju, flutti ávarp og fór nokkrum orðum um sýninguna. 

Sr. Sighvatur hefur um langt árabil fengist við myndlist í frístundum sínum og aflað sér kunnáttu til þessarar iðju hjá mörgum listamönnum.

Hann hefur haldið sýningar á verkum sínum á Húsavík, Dalvík og Færeyjum, einnig tekið þátt í samsýningum í Ráðhúsi Reykjavíkur. Sýningin í Seltjarnarneskirkju er fyrsta einkasýning hans á höfuðborgarsvæðinu.

Málverk sr. Sighvats í Seltjarnarneskirkju byggja á Biblíusöngvum hins heimskunna tónskálds, Antonin Leopold Dvořák (1841-1904). Hann var tékkneskur og samdi meðal annars tíu einsöngslög út frá tíu völdum köflum í Davíðssálmum. Um leið og listamaðurinn, presturinn, hlýddi á söngvana, málaði hann verk sín. Grunnstefið í þessum verkum hans er hringurinn, tákn hins eilífa Guðs. Úr því tákni má og sjá auga Guðs – sem og auga áhorfandans.

Sýningin er á vegum sóknarnefndar Seltjarnarneskirkju og Listvinafélags kirkjunnar.

Kirkjan.is óskar sr. Sighvati til hamingju með þessa heilsteyptu sýningu og hvetur öll þau sem leið eiga um Seltjarnarnesið að skoða sýninguna. Verkin eru sterk í einfaldleika sínum og kalla á margvíslega listræna íhugun - hér vefur presturinn saman listrænum þönkum við trú sína með olíu á striga - og með eftirtektarverðum hætti. 

Hér takast  svo sannarlega í hendur kirkja, trú og list. Eins og svo oft áður. 

hsh


Ólafur Egilsson, formaður Listvinafélags Seltjarnarneskirkju, opnaði sýninguna.
Sr. Sighvatur stendur næst honum og þá kemur sr. Bjarni Þór Bjarnason, sóknarprestur


Eitt verkanna á sýningu sr. Sighvats

Seltjarnarneskirkja.


  • Frétt

  • Menning

  • Messa

  • Samfélag

  • Trúin

  • Viðburður

  • Menning

  • Samfélag

Heimsókn í Kaffistofu Samhjálpar í dag
28
maí

Biskup heimsækir Kaffistofu Samhjálpar

Gagnlegar og góðar umræður
Lindakirkja - þar verður aðalfundur HÍB haldinn - kirkjan vígð 2008
27
maí

Fundað í 205 ár

Aðalfundur HÍB á morgun
Emilía Jónsdóttir, framkvæmdastjóri Útfararstofu kirkjugarðanna
26
maí

Allt færist í fyrra horf

Jafnvel gestabækur hurfu...