Ægir Örn ráðinn

Ægir Örn Sveinsson

Biskup Íslands óskaði nýlega eftir sóknarpresti til þjónustu í Ólafsvíkur- og Ingjaldshólsprestakalli.

Miðað var við að ráðið yrði í starfið frá 1. janúar 2023.

Einn umsækjandi var um starfið og hefur hann nú verið ráðinn.

Það er mag. theol. Ægir Örn Sveinsson.

Ólafsvíkur- og Ingjaldshólsprestakall

Mörk prestakallsins er Snæfellsbær norðan heiða og að Einarslóni.

Í prestakallinu eru þrír þéttbýlisstaðir, Ólafsvík, Rif og Hellissandur.

Prestakallið er myndað af tveimur sóknum og þremur kirkjum, Ólafsvíkursókn með Brimilsvallakirkju og Ólafsvíkurkirkju og Ingjaldshólssókn með Ingjaldshólskirkju.

Sóknirnar hafa samstarf í gegnum sóknarsamlag.

Íbúar í prestakallinu eru 1518.

Ægir Örn Sveinsson er fæddur í Vestmannaeyjum árið 1968, en ólst upp á Seyðisfirði.

Hann hóf guðfræðinám árið 2009 sem hann stundaði meðfram störfum sínum hjá Þjóðskrá Íslands og útskrifaðist með mag. theol próf haustið 2019.

Hann hefur starfað á vettvangi kirkjunnar um árabil.

Má þar nefna afleysingu héraðsprests í Austurlandsprófastsdæmi árið 2018 og seta á kirkjuþingi sem fulltrúi Reykjavíkurprófastsdæmis eystra tímabilið 2014-2018.

Auk þess hefur hann starfað í sóknarnefnd Lindakirkju frá 2010, lengst af sem varaformaður sóknarnefndar.

Þar hefur hann sinnt ýmsum störfum eins og kirkjuvörslu og ræstingum, en einnig haft umsjón með unglingastarfi í tvo vetur og sunnudagaskóla.

Hann hefur haldið utan um og kennt ýmis námskeið svo sem Alfa námskeið auk þess sem hann hefur setið í nokkuð mörg ár í stjórn Alfa á Íslandi.

Hann hefur verið virkur í kór og öðru almennu safnaðarstarfi og leitt lofgjörðar- og bænastundir í Lindakirkju þar sem hann hefur jafnframt stýrt helgihaldi með söng og gítarleik og flutt fjölmargar hugleiðingar.

Í Austurlandsprófastsdæmi sinnti hann afleysingu héraðsprests, sá um helgihald og boðun orðsins í almennum guðsþjónustum, helgistundum og hátíðarguðsþjónustum um páska.

Þá hafði hann umsjón með TTT starfi og unglingastarfi á Eskifirði og Reyðarfirði.

Hann sá um framkvæmdastjórn ÆSKA, sambandi æskulýðsfélaga kirkjunnar á Austurlandi og Kirkjumiðstöðvar Austurlands.

Í því starfi skipulagði hann og kenndi í Farskóla leiðtogaefna og hafði umsjón með ýmsum æskulýðsmótum.

Þá skipulagði hann fermingarbarnamót fyrir Austurland og Hornafjörð, kenndi þar og sá um ýmsa dagskrárliði.

Undirbúningur, skipulagning og yfirumsjón með sumarbúðastarfi á Eiðum var á hans hendi og starfaði hann þá við sumarbúðirnar.

Hann sá um ráðningar og starfsmannahald í tengslum við sumarbúðirnar og alls kyns aðra viðburði.

Eiginkona Ægis er Paula Nerenberg Sveinsson og á hann fjögur börn frá fyrra hjónabandi.

slg

•