Viltu verða vinur Hjálparstarfsins?
Vinir Hjálparstarfsins hafa nú hist reglulega í nokkur misseri
Fólk kemur saman til hádegisverðar þar sem er heimilislegur matur er á boðstólum, fræðist um starfið og stillir saman strengi.
Sú venja hefur skapast að vinirnir hittast síðasta mánudag hvers mánaðar og er fólk hvatt til að bætast í vinahópinn.
Fyrsta hádegissamvera misserisins verður í safnaðarheimili Grensáskirkju mánudaginn 30. september kl. 12:00 og þá snæðir fólk saman.
Öll sem áhuga hafa á starfi Hjálparstarfs kirkjunnar og vilja leggja starfinu lið eru hjartanlega velkomin.
Áskoranir og árangur í lok starfsárs
Yfir hádegisverðinum mun Bjarni Gíslason, framkvæmdastjóri Hjálparstarfs kirkjunnar, fjalla um áskoranir og árangur í starfinu.
Aðalfundur Hjálparstarfs kirkjunnar vegna starfsársins 2023-2024 fer fram laugardaginn 28. september og fá vinirnir því nýjustu fréttir af starfinu yfir hádegisverðinum.
Fyrir þau sem vilja glöggva sig á hinu víðfeðma og mikilvæga starfi Hjálparstarfs kirkjunnar þá má finna starfsskýrsluna hér.
Svo starfsfólk Grensáskirkju geti áttað sig á hve mikill matur þarf að vera á boðstólum er mikilvægt að skrá sig í matinn.
Skráning er á netfanginu help@help.is eða í síma 528 4400.
Múlakaffi mun að þessu sinni annast um veitingarnar, en í boði verður steiktur fiskur ásamt meðlæti.
Verð fyrir máltíðina er kr. 3.500 og mun afraksturinn renna til Hjálparstarfs kirkjunnar.
Eins og áður er getið eru öll sem hafa áhuga á starfi Hjálparstarfs kirkjunnar og vilja leggja starfinu lið hjartanlega velkomin.
slg
