Börn og undraveröld orgelsins

Guðný Einarsdóttir, organisti, við orgel Háteigskirkju - mynd: hsh

Þær eru báðar organistar. Önnur er fyrir norðan og hin fyrir sunnan. Báðar hugmyndaríkar og öflugar. Þær eru fullar af eldmóði fyrir hönd orgelsins, hinnar virðulegu drottningar hljóðfæranna.

Félagið Orgelkrakkar er hugmynd þeirra og henni ýttu þær á flot. Þetta félag stendur fyrir alls konar viðburðum tengdum orgelinu og eru ætlaðir börnum.

Þetta eru þær Guðný Einarsdóttir, organisti í Háteigskirkju, og Sigrún Magna Þórsteinsdóttir, organisti við Akureyrarkirkju.

Nú hafa þær Guðný og Sigrún Magna hafið samstarf við Tónskóla þjóðkirkjunnar um námskeiðahald í sumar þar sem heimur orgelsins verður kynntur fyrir 7-12 ára börnum. Námskeiðið fer fram í Hjallakirkju í Kópavogi.

„Við smíðum orgel á námskeiðinu,“ segir Guðný, „reyndar svona Lego-orgel.“ Þau eru leidd í gegnum smíðina og segir hún að börnin hafi mjög gaman af samsetningunni og séu áhugasöm. Orgelsmíð er vandaverk en börnin eru með gott smiðsauga og leggja pípu eftir pípu eftir leiðsögn ef með þarf og fá svo að spila eins og þau vilja. Hún segir það vera lykilatriði til að opna heim orgelsins fyrir börnum að þau fái að kynnast hljóðfærinu, sjá og reyna.

Spunasmiðja er hluti af námskeiðinu. Sögð eru ævintýri og börnin semja sögur. Finna svo tóna í orgelinu sem hæfa persónum sögunnar og atburðum. Þetta er afar skapandi þáttur í námskeiðinu sem börnin eru afskaplega spennt fyrir og ánægð með.

„Orgelið er eins og litakassi,“ segir Guðný, „og börnin grípa það strax.“ Þau geta nefnilega líka litað með tónum! Hún segir að börn hafi mikinn áhuga á orgelinu.

Börnin þurfa ekki að hafa neinn tónlistarlegan bakgrunn til að taka þátt í námskeiðinu. Námskeiðið stendur yfir dagana 20. -24. júní, frá klukkan 10.00-12.00 – sem sé fimm daga námskeið.

Skráning á námskeiðið fer fram á netfanginu: tonskoli@tonskoli.is og námskeiðsgjaldið er 10.000 kr.

Tónskóli þjóðkirkjunnar styður við bakið á Orgelkrökkum og námskeiðinu. Skólinn mun í haust bjóða börnum upp á kennslu í orgelleik. Það er í fyrsta sinn í sögu skólans sem slíkt gerist. Spennandi verður að sjá hve mörg börn munu skrá sig til náms.

hsh