Kyrrðardagur í Hafnarfjarðarkirkju

Kyrrðardagur í Hafnarfjarðarkirkju mynd-Sr. Aldís Rut

Kyrrðarstarf kirkjunnar tekur á sig margar mismunandi myndir.

Þekktast er kyrrðarstarfið í Skálholti þar sem fólk kemur saman, gjarnan yfir helgi, til kyrrðar og íhugunar á lífi sínu og trú.

Þar sem fáir söfnuðir geta boðið upp á gistingu hefur færst í aukanna að kirkjurnar bjóði upp á kyrrð í einn dag.

Þann 19. nóvember síðastliðinn var kyrrðardagur í Hafnarfjarðarkirkju.

Sr. Aldís Rut Gísladóttir prestur kirkjunnar og Bylgja Dís Gunnarsdóttir, æskulýðsfulltrúi kirkjunnar, höfðu umsjón með deginum.

Iðkuð var kyrrðarbæn, sem Bylgja Dís leiddi, en hún hefur iðkað kyrrðarbæn í um 10 ár og er með kennsluréttindi í henni frá Contemplative Outreach. 

Kyrrðarbæn er íhugunaraðferð úr kristinni hefð sem hefur verið stunduð í einhverri mynd alveg frá frumkristni.

Kyrrðarbæn er afar einföld iðkun sem fer fram í þögn og gengur út á að hvíla í nærveru Guðs og samþykkja verk heilags anda innra með okkur.

Þótt aðferðin sé einföld leiðir hún til aukinnar sjálfsþekkingar og dýpra sambands við Guð og menn.

Á kyrrðardeginum í Hafnarfjarðarkirkju var einnig stunduð biblíuleg íhugun, samhygðarbæn og gönguíhugun.

Samkvæmt því sem sr. Aldís Rut Gísladóttir sagði fréttaritara kirkjan.is leiddi hún djúpslökun á kyrrðardeginum og léttar yogaæfingar, en hún er menntaður yogakennari og hefur leitt djúpslökun og yoga í kirkjum.

Og sr. Aldís bætti við:

„Snæddur var dýrindis hádegisverður í þögn, en dagurinn fór að mestu leyti fram í þögn og kyrrð.

Dagurinn veitti þátttakendum tækifæri til að íhuga, dvelja og endurnærast í mildi og kyrrð og fékk mjög góðar viðtökur og mikil ánægja var meðal þátttakenda með framtakið.

Sunnudaginn 20. nóvember var svo kyrrðarmessa í Hafnarfjarðarkirkju og þar með lauk þessari kyrrðarhelgi í Hafnarfjarðarkirkju sem verður endurtekin eftir áramót."

slg

Myndir með frétt