Bjuggu til jólakort
Afrakstur af vinnu barnanna í fallega skreyttum krukkum á altari Kirkjuselsins-mynd sr.Kristín Þórunn TómasdóttirJólaboðskapurinn felur það í sér að margir vija leggja þeim lið sem minna mega sín í samfélaginu.
Innanlandsaðstoð Hjálparstarfs kirkjunnar vinnur ötult starf á aðventu og Mæðrastyrksnefnd stendur fyrir afar umfangsmikilli jólaaðstoð.
En kirkjurnar víða um land eru margar hverjar með hjálparsjóði sem fólk getur leitað í allan ársins hring, þó að sjálfsögðu sé alltaf mest leitað í slíka sjóði fyrir jólin.
Slík aðstoð getur breytt öllu fyrir efnaminni fjölskyldur, en öll langar okkur að gleðja börnin á jólum og helst hafa veislumat á borðum.
Í Múlaþingi er starfræktur sjóður sem nefnist Jólasjóður Múlaþings og er hann þá eingöngu hugsaður til úthlutunar fyrir jól.
Jólasjóðurinn er samstarfsverkefni Rauða krossins, Þjóðkirkjunnar, AFLs starfsgreinafélags, Lionsklúbbanna á Héraði og á Seyðisfirði auk Múlaþings sjálfs en honum er ætlað að styrkja fjölskyldur og einstaklinga í Múlaþingi og á Vopnafirði sem búa við þröngan kost.
Nemendur í leikskólanum Hádegishöfða ásamt kennurum sínum komu í Kirkjuselið í Fellabæ nýlega og þau voru ekki tómhent.
Börnin í leikskólanum höfðu búið til sín eigin jólakort og selt foreldrum sínum.
Það var afrakstur þeirrar vinnu sem börnin höfðu með sér í Kirkjuselið í Fellabæ og afhentu sr. Kristínu Þórunni Tómasdóttur, presti í Egilsstaðaprestakalli.
Gáfu þau alla fjárhæðina í Jólasjóð Múlaþings.
slg
