Lyftuvígsla í Breiðholtskirkju
Sunnudaginn 17. mars var stór stund í Breiðholtskirkju þegar hjólastólalyfta var tekin formlega í notkun í lok guðsþjónustu þar sem sóknarpresturinn, sr. Magnús Björn Björnsson, þjónaði.
Um nokkurt skeið hefur söfnun staðið yfir til að kosta hjólastólalyftu í Breiðholtskirkju. Haldnar voru tombólur til að afla fjár og þá voru og haldnir styrktartónleikar. Frjáls framlög bárust einnig til verkefnisins. Söfnunin stóð yfir í rúmlega hálft ár. Hjólastólalyftan kostaði tæpar tvær milljónir króna með uppsetningu. Sóknarnefnd, Hollvinafélag Breiðholtskirkju og starfsfólk, hafði forystu í málinu.
Hjólastólalyftan tengir saman safnaðarheimilið og kirkjuna. Um er að ræða mikil umskipti í ferlimálum fatlaðra í kirkjunni.
Af þessu tilefni var haldin sérstök þakkarhátíð við guðsþjónustu í Breiðholtskirkju. Öllum þeim sem komið hafa að verkinu var þakkað fyrir.
Sr. Gísli Jónasson, prófastur í Reykjavíkurprófastsdæmi eystra, vígði hjólastólalyftuna við mikinn fögnuð viðstaddra.
Í lok guðsþjónustunnar og vígslunnar bauð sóknarnefnd í veglegt kirkjukaffi. Þar flutti formaður sóknarnefndar, Vigdís V. Pálsdóttir, ávarp og gerði stutta grein fyrir verkinu og þakkaði öllum fyrir aðstoðina.
Á myndinni með fréttinni má sjá sr. Gísla Jónasson, prófast, fara í vígsluferðina í hinni nýju hjólastólalyftu í Breiðholtskirkju.
